გერმანიის პრეზიდენტი სომხეთში ჩავიდა

რეგიონი

01.04.2025

სომხეთის პრემიერ-მინისტრმა ნიკოლ ფაშინიანმა და მისმა ცოლმა ანა ჰაკობიანმა სომხეთის მთავრობის შენობაში ოფიციალური ვიზიტით სომხეთში მყოფ გერმანიის პრეზიდენტ ფრანკ-ვალტერ შტაინმაიერს და ელკე ბუდენბენდერს უმასპინძლეს.

როგორც „არმენპრესი“ იუწყება, ნიკოლ ფაშინიანი და ფრანკ-ვალტერ შტაინმაიერი გაფართოებულ შემადგენლობაში შეხვდნენ ერთმანეთს, ხოლო ანა ჰაკობიანსა და ელკე ბუდენბენდერს შორის პირადი საუბარი შედგა.

“სომხეთისა და გერმანიის პრეზიდენტებმა განიხილეს ორმხრივი ეკონომიკური თანამშრომლობის გაღრმავებისა და განვითარების საკითხები, მათ შორის ენერგეტიკის სფეროში” ,- ამის შესახებ სომხეთის პრეზიდენტ ვააგნ ხაჩატურიანთან ერთობლივ პრესკონფერენციაზე განაცხადა გერმანიის პრეზიდენტმა ფრანკ-ვალტერ შტაინმაიერმა, „არმენპრესის“ მიერ სომხეთ-გერმანიის ეკონომიკური თანამშრომლობის მიმდინარე დონესა და მისი განვითარების პერსპექტივებზე დასმულ კითხვაზე პასუხისას.

„ვხედავთ, რომ ეს ცვლილებები სომხეთში უკვე დიდი ხანია დაწყებულია. თუ მომავალზე ვისაუბრებთ, მნიშვნელოვანია არა მხოლოდ ქარის ენერგია, არამედ წყალბადის ენერგიაც“, – აღნიშნა შტაინმაიერმა.

გერმანიის პრეზიდენტმა განაცხადა, რომ მნიშვნელოვანია არა მხოლოდ განახლებადი ენერგიის შექმნა, არამედ მისი ტრანსპორტირებაც სხვა რეგიონებში შესაბამისი კომუნიკაციების შექმნით.

„თუ სომხეთი შეძლებს ასეთი ინფრასტრუქტურის შექმნას, ჩვენ ამას მივესალმებით“, – აღნიშნა მან.

სომხეთის პრეზიდენტ ვააგნ ხაჩატურიანის თქმით, სომხურ-გერმანული დელეგაციების შეხვედრებზე განხილული იყო ორმხრივი ეკონომიკური ურთიერთობების საკითხები, რადგან ევროკავშირის წევრ ქვეყნებს შორის გერმანია პირველ ადგილზეა სომხეთთან სავაჭრო ბრუნვის მოცულობით.

მისი თქმით, ეკონომიკური საკითხები უფრო ფართო კონტექსტში განიხილეს და მათ შორის შეეხნენ სამხრეთ კავკასიის ქვეყნებიდან ევროკავშირში ელექტროენერგიის ექსპორტის შესაძლებლობებს.

„განხილვების ფარგლებში ჩვენს დღის წესრიგში შევიდა შავი ზღვის კაბელის საკითხიც. მჯერა, რომ მომავალში, გერმანიის დახმარებითა და ევროკავშირის პარტნიორების მხარდაჭერით, ჩვენ ასევე შევძლებთ მისი ნაწილი გავხდეთ, რადგან დღეს სომხეთის ენერგობალანსში მწვანე ენერგიის წილი დაახლოებით 40 პროცენტს (თუ არა მეტს) შეადგენს და ეს მაჩვენებელი კვლავ გაიზრდება. ასევე გვექნება ელექტროენერგიის სიჭარბე, რომელიც ექსპორტზე უნდა გავიტანოთ“, – აღნიშნა ხაჩატურიანმა.

სომხეთის პრეზიდენტმა დაამატა, რომ თუ ევროკავშირი საკუთარ ეკონომიკურ განვითარების მიდგომებს გადახედავს, სომხეთს შეუძლია ისარგებლოს ამ ახალი შესაძლებლობებით და თავისი პოტენციალი გერმანიასთან თანამშრომლობის მიმართულებით გამოიყენოს.