ფაბრიკა–ქარხნების მშენებლობა, როგორც დასაქმების პრობლემის მოგვარების ერთ–ერთი გზა – ახალციხის მერის დაპირება ვერ სრულდება. საწარმოს მშენებლობა, რომლის შესახებაც გიორგი კოპაძემ ,,მე–9 არხთან“ ოქტომბრის თვეში ისაუბრა – შეფერხდა. ქალაქის მერი 8 თვის წინ ირწმუნებოდა, რომ მემორანდუმი გაფორმებული იყო და ქარხნის მშენებლობა დაიწყებოდა, სადაც 150 ადამიანი უნდა დასაქმებულიყო.
ქალაქის მერი ახალციხის მოსახლეობას ქარხნის აშენებას 2014 წლის 9 ოქტომბერს, ტელეკომპანია ,,მე–9 არხის“ პირდაპირ ეთერში, თოქ–შოუ ,,დიალოგში“ სტუმრობისას დაპირდა. ეს არ იყო პირველი შემთხვევა, როცა გიორგი კოპაძემ დასაქმების პრობლემის გადაჭრის ერთ–ერთ გზად ქარხნების შენებლობა დაასახელა. წინასაარჩევნოდ, როგორც მოსახლეობასთან, ასევე ,,მე–9 არხთან“ ამბობდა, რომ მისი არჩევის შემთხვევაში, ქალაქში ქარხნები შეიქმნებოდა. მერად არჩევიდან ერთი წლის შემდეგ ამბობს, რომ ქარხნების მშენებლობისთვის ადგილობრივ თვითმმართველობაში თანხები არ მოიძებნება, პროცესი მხოლოდ კერძო ინვესტორთა კეთილ ნებაზეა დამოკიდებული. მერიის ვალდებულებაში მხოლოდ მათი ხელშეწყობა და ბიუროკრატიული პრობლემების მოგვარება შედის. კოპაძის თქმით, ქარხნის მშენებლობა, რომელზეც 8 თვის წინ საუბრობდა, დამფინანსებელი კომპანიის მხრიდან შეფერხდა.
მერის დაპირებებისა და ქალაქში ბიზნესის განვითარების რისკებზე საუბრობს ახალციხის ბიზნეს–ცენტრის ხელმძღვანელი. გოჩა ათოშვილი ვარაუდობს, რომ გიორგი კოპაძეს დაპირებების გაცემის დროს ქალაქში არსებული ბიზნეს–გარემო შესწავლილი არ ჰქონდა, დღეს კი ამ კუთხით არაერთ პრობლემას გადააწყდა. გოჩა ათოშვილის თქმით, ახალციხეში საწარმოების გასავითარებლად საინვესტიციო გარემო–პირობები არ არსებობს. ბიზნესისათვის წამგებიანი მდგომარეობის გამო, ინვესტორები თანხას ახალციხეში არ ჩადებენ.
არის თუ არა ახალციხეში ბიზნესის განვითარებისათვის აუცილებელი საინვესტიციო გარემო– ექსპერტებდა და ბიზნეს წრეების წარმომადგენლებს ამაზე განსხვავებული აზრი აქვთ. ადგილობრივ მოსახლეობას კი მერისა და მმართველი პარტიის დაპირებებიდან, ყველაზე მეტად, ქარხანა–ფაბრიკების მშენებლობის ხარჯზე, უმუშევრობის დაძლევის დაპირება ახსოვთ.
ახალციხეში ფაბრიკა–ქარხნების მშენებლობის შესახებ დაპირებები, როგორც საპარლამენტო, ისე 2014 წლის 15 ივნისის ადგილობრივი თვითმმართველობის არჩევნებამდე გაიცა. მიუხედავად იმისა, რომ ქალაქის მასშტაბით მსგავსი ობიექტების მშენებლობა არ დაწყებულია, ახალციხის მერი კიდევ ერთი ქარხნის მშენებლობაზე საუბრობს. მისი თქმით, ინვესტორები ხილ–ფაფის გადამამუშავებელი საწარმოს გახსნას გეგმავენ. თუმცა როდის განხორცილედება პროექტი ეს ბიზნესმენების შესაძლებლობებსა და კეთილ ნებაზეა დამოკიდებული.