ლარის ინფლაციამ მოსახლეობის საარსებო მინიმუმზე გავლენა მოახდინა. საქართველოს სტატისტიკის ეროვნული სამსახურის ინფორმაციით, საარსებო მინიმუმი ანუ თანხის ის რაოდენობა, რომელიც ზრდასრულ, შრომისუნარიან ადამიანს, ნორმალურად კვებისათვის და აუცილებელი ნივთების შესაძენად სჭირდება, 160 ლარამდე განისაზღვრა. თუმცა, ახალციხეში ამბობენ, რომ ლარის კურსის ვარდნის ფონზე, აღნშნული თანხა არასაკმარისია.
ეს ქალბატონი 77 წლის ვერა ლომსაძეა. იგი უკვე წლებია ახალციხეში საკუთარ ბინაში მარტო ცხოვრობს და თავს 150 ლარიანი პენსიით ირჩენს. მიუხედავად იმისა, რომ საქსტატის მიერ, საშუალო მომხმარებლის არსებობისათვის დადგენილი მინიმუმი 143 ლარით განისაზღვრა, ვერა ლომსაძე ამბობს, რომ პენსია არსებობისათვის არ ჰყოფნის. მისი თქმით, თანხას ყოველთვიურად კომუნალური გადასახადებისთვისაც ანაწილებს. რაც შეეხება სურსათს, მოხუცი ქალბატონი მიიჩნევს, რომ ბოლო პერიოდში, პროდუქტზე ფასები 2–ჯერ გაიზარდა, რის გამოც, სურსათის შეძენა უჭირს.
ლარის კურსის ვარდნა საქართველოში 2014 წლის ნოემბრის თვიდან დაიწყო. პროცესმა გავლენა სურსათის ფასებზე მოახდინა. გაძვირებული პროდუქტის მიუხედავად, გასულ წელთან შედარებით, საარსებო მინიმუმისათვის თანხა თითქმის უცვლელი დარჩა. საქართველოს სტატისტიკის ეროვნული სამსახურის ინფორმაციით, შრომისუნარიან ადამიანს, ნორმალურად კვებისა და აუცილებელი ნივთების შესაძენად, 160 ლარი სჭირდება. თანხამ გასულ წელთან შედარებით, 10 ლარით მოიმატა. თუმცა, ახალციხის სავაჭრო ცენტრში ამბობენ, რომ არსებობისათვის მომხმარებლებს გაცილებით მეტი სჭირდებათ, რადგან ბაზარში პროდუქტს ორმაგი ფასი აქვს.
პროდუქტზე გაზრდილი ფასებისა და არასაკმარისი თანხის გამო, ახალციხის სავაჭრო ცენტრში მომხმარებელთა რაოდენობა საგრძნობლად შემცირდა. მცირე მეწარმეები ამბობენ, რომ შესაძლოა დღის განმავლობაში მათთან ბოსტნეულის საყიდლად მომხმარებელი საერთოდ არ მივიდეს. ანალოგიური მგომარეობაა ხორცის სექციაშიც. მოვაჭრეები აღნიშნულის მიზეზად, ლარის კურსის ვარდნასა და ეკომომიკური მდგომარეობის გაუარესებას ასახელებენ.
ლარის ინფლაციასა და საარსებო მინიმუმზე მისი გავლენის შესახებ, ეკონომიკის მეცნიერებათა დოქტორი, რიონ თათეშვილი საუბრობს. ექსპერტის თქმით, ქვეყანაში მიმდინარე ეკონომიკურმა პროცესებმა მოსახლეობის სამომხმარებლო კალათაზე მკვეთრი გავლენა მოახდინა. მისი განმარტებით, 12 სახეობის სამომხმარებლო პროდუქტზე, რომლის მიხედვითაც საქსტატი საარსებო მინიმუმს ადგენს, ფასები გაიზარდა, შესაბამისად, მოსახლეობას არსებობისათვის თანხა გაცილებით მეტი სჭირდება, ვიდrე ეს გასულ წელს იყო.
საარსებო მინიმუმს, საქართველოს სტატისტიკის ეროვნული სამსახურის მონაცემების მიხედვით, შრომისუნარიანი ადამიანის, ნორმალური, სიცოცხლისათვის აუცილებელი საკვების რაოდენობას მოიცავს. მინიმალური სამომხმარებლო კალათის მიხედვით, შრომისუნარიანმა ადამიანმა, დღეში 2 300 კილო კალორია უნდა მიიღოს. ძირითადი მოხმარების პროდუქტები კი რძის ნაწარმი, ხორცი, ცხიმი, ბურღულეული, პური, კვერცხი, ხილი და ბოსტნეული უნდა იყოს. ამ ყველაფრისთვის კი საქსტატის ინფორმაციით, ერთი ადამიანისათვის, დაახლოებით 160 ლარი საკმარისია. თუმცა დოლარის კურსის მატების ფონზე, რომელიც დღეის მდგომარეობით 2.34 ლარს შეადგენს და მნიშვნელოვან გავლენას ახდებს პროდუქტების ფასებზე, ადგილობრივებს თავის რჩენა უჭირთ.
