უკვე ორი წელია სახელმწიფო უნივერსიტეტებში 17 მიმართულებაზე სწავლა უფასოა, მიუხედავად ამისა, აბიტურიენტებისათვის, ყველაზე სასურველ პროფესიებად, მაინც ბიზნესი, სამართალი და საერთაშორისო ურთიერთობები რჩება. რატომ არ ინტერესდებიან ახალგაზრდები, საბუნებისმეტყველო თუ ტექნიკური ფაკულტეტებით საქართველოში და რატომ ვერ არჩევენ საჯარო უწყებებში სასურველ კანდიდატებს – თემით “მეცხრე არხი” დაინტერესდა.
თაკო თუმანიშვილი და მარი მოდებაძე აბიტურიენტები არიან. ისინი ერთიანი ეროვნული გამოცდებისთვის ემზადებიან, რათა სასურველ პროფესიებს დაეუფლონ. ორივეს კარგად აქვს გაცნობიერებული თუ რა კუთხით იმუშავებენ მომავალში. თაკო საქმიანობის გაგრძელებას ეკონომიკის მიმართულებით აპირებს, ხოლო მარიამი პოლიციის აკადემიაში აბარებს, რათა სამართალმცოდნეობას დაეუფლოს. ახალგაზრდები ამბობენ, რომ მათთვის ფაკულტეტების არჩევა იმ გარემოებებმა განაპირობა, რომელიც დღესდღეობით ქვეყანაშია.
გოგონებისაგან გასხვავებით, თემურ ინასარიძე უკვე სტუდენტია და სასურველ პროფესიასაც სამცხე–ჯავახეთის სახელმწიფო უნივერსიტეტში ეუფლება. ერთი წლის წინ, მან არჩევანი საჯარო მმართველობაზე გააკეთა და ამბობს, რომ მის გადაწყვეტილებაზე გავლენა ქვეყანაში არსებულმა გარემოებებმა იქონია. ახალგაზრდა სტუდენტი აღნიშნავს, რომ დღესდღეობით პროფესიების არჩევა არა სურვილით, არამედ ფინანსური დაინტერესების კუთხით ხდება.
სამცხე–ჯავახეთის სახელმწიფო უნივერსიტეტის პროფესორი და მეცნიერებათა დოქტორი ამბობს, რომ ისეთ მიმართულებებზე, რომლებზეც სახელმწიფო უნივერსიტეტებში სწავლა უფასოა, ახალგაზრდების მხრიდან დაინტერესება, წინა წლებთან შედარებით, გაიზარდა. მიუხედავად ამისა, ზაზა სამსონიძე მიიჩნევს, რომ დღეისათვის ქვეყანაში გარკვეულ სპეციალობებზე კადრების ნაკლებობაა.
არქიტექტორი, გეოლოგი, ინჟინერი – ეს ის პროფესიებია, რომელთა მიმართაც ახალგაზრდების ინტერესმა წლებია იკლო. გეოლოგი ალექსი ბერიძე ამბობს, რომ აღნიშნული, რამდენიმე გარემოებამ განაპირობა. გეოლოგის თქმით, არაპოპულარულ ფაკულტეტთა რიცხვში ის მიმართულებები მოხვდნენ, რომლის დასრულების შემდეგაც, ახალგაზრდები დასაქმების კუთხით პრობლემებს აწყდებიან.
ახალციხის გამგეობაში საჯარო მოხელეთა შესარჩევი კონკუსის დროს, კანდიდატთა შერჩევა, სამშენებლო და აგრარული მიმართლებებით გაუჭირდათ. მუნიციპალიტეტის გამგებლის თქმით, კანდიდატები არსებულ მოთხოვნებს ვერ აკმაყოფილებდნენ. შესაბამისად, აღნიშნულ თანამდებობებზე პოზიციები, კვლავ ვაკანტური დარჩა.
რესპოდენტები თანხმდებიან, რომ რამდენიმე წლის შემდეგ პროფესიებზე, რომელთა მიმართ დღესდღეობით დაინტერესება ნაკლებია, ახლო მომავალში სერიოზული დეფიციტი გაჩნდება. ამიტომ, ამ მიმართულებით გარკვეული ნაბიჯები უნდა გადაიდგას და პრობლემის მოგვარების გზებიც დაისახოს. სპეციალისტები ფიქრობენ, რომ ტექნიკური თუ საბუნებისმეტყველო ფაკულტეტების დაუფლების შემდეგ, ახალგაზრდების დასაქმება, პრობლემის მოგვარების ერთერთი გზაა.
