ევროკავშირთან ასოცირების ხელმოწერილი დოკუმენტის თანახმად, საქართველო ვალდებულია მგზავრების უსაფრთხო გადაყვანისთვის შექმნას კომფორტული გარემო, ქვეყანაში მოძრაობდეს ტექნიკურად გამართული სატრანსპორტო საშუალებები და ამასთანავე ამაღლდეს მძღოლების კვალიფიკაცია. აღნიშნულთან დაკავშირებით განსხვავებული მოსაზრებები აქვთ ახალციხელ მძღოლებსა და მგზავრებს. ხოლო საკითხზე მომუშავე არასამთავრობო ორგანიზაციები ქვეყანაში არსებული სიტუაცის შეცვლას ცდილობენ.
სოსო ხითარიშვილი ევროკავშირთან ასოცირების შეთანხმებაში არსებულ იმ პუნქტებზე საუბრობს, რომელთა თანახმადაც, საქართველო ვალდებულია მგზავრების უსაფრთხო გადაყვანისთვის კომფორტული გარემო შექმნას და ქვეყანაში ტექნიკურად გამართული სატრანსპორტო საშუალებები მოძრაობდეს. ფიქრობს, რომ ყველა ავტომობილმა ტექდათვალიერება სისტემატურად უნდა გაიაროს და ქვეყანაში გაუმართავი ავტომობილების ექსპლუატაცია აიკრძალოს. თუმცა მისივე მტკიცებით, საქართველოში ჯერ საზოგადოება უნდა მომზადდეს სხვა პრობლემების დასაძლევად.
სოსოს მსგავსად ფიქრობენ სხვა ახალციხელი მძღოლებიც, თუმცა პრობლემის მოგვარების გზებზე მათი მოსაზრება არაერთგვაროვანია.
ახალციხელი მგზავრები კი აღნიშნავენ, რომ მძღოლმა ყველა ის მოთხოვნა უნდა დააკმაყოფილოს, რომელსაც მას საერთაშორისო სტანდარტი ავალდებულებს.
ევროკავშირთან ასოცირების ხელმოწერილი დოკუმენტის თანახმად, საქართველო ვალდებულია მგზავრების უსაფრთხო გადაყვანისთვის შექმნას კომფორტული გარემო, ქვეყანაში მოძრაობდეს ტექნიკურად გამართული სატრანსპორტო საშუალებები და მოძრაობის წესები დაიცვან როგორც ქვეითმა მოსიარულეებმა, ასევე მძღოლებმა. შპს ,,მგზავრი“–ს დირექტორი ყურადღებას მგზავრთა უფლებების დაცვაზე ამახვილებს.
მძღოლი ჯანმრთელი რომ უნდა იყოს, უნდა შეეძლოს ყურადღების განსაკუთრებული მობილიზება, მოძრაობდეს ტექნიკურად გამართული ავტომანქანით და გზაც თავის მხრივ სწორად და მკვეთრად უნდა იყოს დახაზული – ამაზე ავტომობილის მართვის ინსტრუქტორი კუკური ასპანიძეც საუბრობს. მისივე თქმით, სწორედ ზემოთ ჩამოთვლილი კომპონენტების დარღევის შემდეგ ხდება ავტოსაგზაო შემთხვევები. ამიტომ ავტომობილის მართვის ინსტრუქტორს მიაჩნია, რომ ის პუნქტი, რომელსაც საქართველოს ევროკავშირთან ასოცირების ხელშეკრულება ავალდებულებს საკმაოდ მნიშვნელოვანია.
რა კუთხით შეიძლება ქვეყანაში არსებულ სატრანსპორტო საშუალებებთან დაკავშირებული პრობლემების მოგვარება – ამ საკითხზე მომუშავე არასამთვრობო ორგანიზაციები უკვე წლებია მსჯელობენ. ,,საქართველოს ალიანსი უსაფრთხო გზებისთვის“ გამგეობის თავმჯდომარე ქვეყანაში სიტუაციის მოწესრიგების გზას ალტერნატიული სატრანსპორტო საშუალებების გაჩენასა და რეგულაციების გამკაცრებაში ხედავს. ეკა ლალიაშვილის აზრით, კანონი, პრაქტიკაში უნდა განხორციელდეს.
ევროკავშირთან ასოცირების შეთანხმება საავტომობილო გადაზიდვებში მონაწილე მძღოლების კვალიფიკაციის ამაღლებასა და პროფესიულ გადამზადებასაც ითხოვს. საქართველოს მოქალაქე მძღოლები, რომლებიც მგზავრების გადაყვანასა და სატვირთო გადაზიდვებს ევროგაერთიანების ტერიტორიაზე ახორციელებენ, 2017 წლისთვის სავალდებულო პროფესიულ გადამზადებას გაივლიან. შიდა ტრანსპორტირებაში დასაქმებული მძღოლებისთვის კი კვალიფიკაციის ამაღლება სავალდებულო 4 წლის შემდეგ იქნება.
