სურსათის ეროვნულმა სააგენტომ სამცხე ჯავახეთში ბრუცელოზის საწინააღმდეგო ღონისძიებები დაიწყო. რეგიონში 60 ათასამდე მსხვილფეხა პირუტყვის სისხლის ნიმუშების კვლევა იგეგმება. სერომონიტორინგი ჩატარდება ასევე ქვემო ქართლის, მცხეთა-მთიანეთისა და შიდა ქართლის რეგიონებშიც. მიმდინარე წელს 200 ათასი სული მსხვილფეხა პირუტყვის სისხლის ნიმუშების კვლევაა დაგეგმილი, რის შემდეგაც მომდევნო წელს ჯანმრთელ პირუტყვს ვაქცინაცია ჩაუტარდება.
ბრუცელოზის მასობრივი ტესტირება 2014 წლიდან დაიწყო. 2015 წელს სოფლის მეურნეობის სამინისტროს, სურსათის ეროვნული სააგენტოს და გაეროს სურსათისა და სოფლის მეურნეობის ორგანიზაციის (FAO) ექსპერტების მონაწილეობით გრძელვადიანი სტრატეგია შემუშავდა, რომელიც ბრუცელოზთან ბრძოლის კომპლექსური ღონისძიებების შემუშავებასა და მის ეტაპობრივ განხორციელებას ითვალისწინებს. სამცხე–ჯავახეთში ბრუცელოზის დადასტურების ყველაზე მეტი ფაქტი ასპინძის მუნიციპალიტეტის სოფელ რუსთავში დაფიქსირდა. ამიტომ რეგიონში ბრუცელოზის საწინააღმდეგო ღონისძიებები სწორედ რუსთავიდან დაიწყო.
ბრუცელოზი ქრონიკულად მიმდინარე ინფექციური დაავადებაა, რომლითაც ავადდება მრავალი სახეობის ცხოველი და ადამიანი. დაავადება ვრცელდება ინფიცირებულ ცხოველთან კონტაქტით ან მისგან მიღებული პროდუქტით. ბრუცელოზი დიდ ეკონომიკურ ზარალს აყენებს სოფლის მეურნეობას. დაავადებული ცხოველი სასაკლაოზე ვეტერინარის მეთვალყურეობის ქვეშ უნდა დაიკლას, აკრძალულია ბრუცელოზით ინფიცირებული პირუტყვის რძის პროდუქტების სასურსათედ გამოყენება.
