ავთო ჩიტაშვილმა, მის სასათბურე მეურნეობაში, ყვავილოვანი კომბოსტოს შემდეგ, ბროკოლის მოყვანა სცადა. ამ ბოსტნეულ კულტურაზე არჩევანი, მისი გამძლეობისა და მაღალი სარეალიზაციო ფასის გამო შეაჩერა. რეგიონის მკაცრი კლიმატური პირობებიდან გამომდინარე, ბროკოლი ვალელი ფერმერისთვის, ყველაზე მისაღები აღმოჩნდა. მცენარე მინუს 2–3 გრადუს ყინვასაც უძლებს, ამიტომ ავთო ჩიტაშვილი, ბროკოლის რეალიზაციას, მთელი ზამთარის განმავლობაში ახდენდა.
ბროკოლის ჯიშებს, აერომენსა და ფიესტას, რომლებიც ავთო ჩიტაშვილს სასათბურე მეურნეობაში მოჰყავს, სხვა სახეობისგან ის განასხვავებს, რომ რამდენიმე მოსავალს იძლევა, რაც ფერმერისთვის, რომელიც საქმიანობის ბიზნესად ჩამოყალიბებას ცდილობს, უმნიშვნელოვანესი დეტალია.
ავთო ჩიტაშვილს სასათბურე მეურნეობის მოწყობის იდეა რამდენიმე წლის წინ გაუჩნდა. რეგიონული განვითარების ასოციაციამ მას ორი პროექტი დაუფინანსა, რისი დახმარებითაც ფერმერმა 270 კვადრატულ მეტრ ფართობზე სათბური მოაწყო. ჩიტაშვილმა, საქმიანობა რვა წლის წინ, რვა ათასი ძირი ყვავილოვანი კომბოსტოს მოყვანით დაიწყო, დღეს კი ჩიტაშვილებს, 30 ათასზე მეტი ძირი ბოსტნეული კულტურა მოჰყავთ.
სასათბურე მეურნეობის გარდა, ჩიტაშვილები ორ ჰექტარ მიწის ფართობზე, ყვავილოვანი კომბოსტოს 30 ათასზე მეტ ძირ ნერგს რგავენ. ჩითილები სათბურში თავად გამოჰყავთ. ბოსტნეული, დარგვიდან 60 დღეში, პირველ მოსავალს იძლევა. ფერმერი ამბობს, რომ საქმიანობა, რომელიც უკვე ოჯახურ ბიზნესად იქცა, შრომატევადია, ამიტომ ბოსტნეული კულტურის მოვლაში, მთელი ოჯახია ჩართული.
ბროკოლისა და ყვავილოვანი კომბოსტოს მოყვანა, რისკთანაა დაკავშირებული – ამბობს ფერმერი. მისი თქმით, ყვავილოვანი კომბოსტო შედარებით იაფია, ამიტომ მისი რეალიზაცია მარტივია. ბროკოლი ძვირი ღირს, რის გამოც ბაზარზე ისე წარმატებით ვერ იყიდება, როგორც ყვავილოვანი კომბოსტო. ამას ისიც ემატება, რომ იმპორტირებული ბოსტნეული ადგილობრივს, დიდ კონკურენციას უწევს.
ავთო ჩიტაშვილი, ბროკოლისა და ყვავილოვანი კომბოსტოს რეალიზებას, ახალციხესა და თბილისში ახორციელებს. ფერმერი ამბობს, რომ ბაზარი არასტაბილურია, ფასი სეზონის და მოთხოვნის მიხედვით მერყეობს.
ფერმერი სახელმწიფოსგან მხარდაჭერის აუცილებლობაზე საუბრობს. ავთო ჩიტაშვილის თქმით, გლეხის მთავარი პრობლემა, პროდუქტის რეალიზაციაა. იმის გამო, რომ რამდენიმე წლის წინ, 60 ტონა კომბოსტო ვერ გაყიდა, ბოსტნეული დაულპა და გადაყარა. ამ შემთხვევის შემდეგ ფერმერმა გადაწყვიტა, რომ ამ კულტურის მოყვანაზე უარი ეთქვა და სანაცვლოდ, ბროკოლითა და ყვავილოვანი კომბოსტოთი დაინტერესდა.
