ახალი ტექნოლოგიები და მისი მნიშვნელობა ფერმერულ მეურნეობაში. სამცხე–ჯავახეთში სოფლის მეურნეობის განვითარების მიზნით,  ფერმერებმა სხვადასხვა სახის ტექნოლოგიის დანერგვა დაიწყეს.

სოფელ რუსთავში მცხოვრები ვაჟა ძირკვაძე იმ ფერმერთა რიცხვს მიეკუთვნება, რომელმაც საკუთარი ინიციატივით, ახალი ტექნოლოგიების დანერგვა დაიწყო. იგი სოფელში საქონლის სადგომს თანამედროვე სტანდარტების  შესაბამისად აშენებს. ბოსელი  ოთხი  სული  პირუტყვისთვის იქნება განკუთვნილი. იგი  4 000 ლარამდე ჯდება, მის მშენებლობას ერთ თვეში დაასრულებს, მანამდე კი ფერმერი  საფრანგეთიდან ახალი ჯიშის პირუტყვის – ჰორშტეინის  ჩამოყვანას გეგმავს.

საქონლის სადგომის თანამდროვე სტანდარტებით მოწყობისა და  ახალი ჯიშების გამრავლების ინიციატივის გარდა,  ვაჟა ძირკვაძე,  სილოსის წარმოებასაც ახორციელებს. ფერმერი მიიჩნევს, რომ საკვებწარმოებაში სილოსი  ეფექტურია. ერთ ჰექტარზე, 20–25 ტონამდე სიმინდის მასას იღებს, დამუშავების შემთხვევაში კი  იგი მოცულობასა და კალორიულობასა ინარჩუნებს, შესაბამისად დანაკარგი ნაკლებია. გარდა ამისა სილოსის მიღების შემდეგ საქონელი მეტად  პროდუქტიული ხდება.

ვაჟა ძირკვაძის მსგავსად, ახალი ტექნოლოგიების დანერგვას ცდილობს მისი თანასოფლელი თამაზ შავაძეც. ფერმერის თქმით, საქონლის სადგომებში ახალი მოწყობილობის დამონტაჟების შემდეგ, ოთხმა ძროხამ  ხუთ ლიტრამდე რძის ნამატი მისცა. ამიტომ იგი სოფლის მეურნეობით დაინტერესებულ პირებს თანამედროვე ტექნოლოგიების გამოყენებას ურჩევს.

სოფლის მეურნეობის განვითარებისათვის ახალი ტექნოლოგიების დანერგვა რომ მნიშვნელოვანია, ამაზე სოფელ რუსთავის მაცხოვრებლებიც თანხმდებიან. თუმცა, ფერმერები მიიჩნევენ,  რომ  ამ კუთხით პირველ რიგში მათი ინფორმირება უნდა მოხდეს.

ლუდის ანარჩენისა და კომბინირებული საკვების დამატების ექსპერიმენტები, სადგომებში ავტომატური  დაწყურების სისტემების მონტრაჟი –  მსგავსი სახის სიახლეების დანერგვას  საქართველოს ბიზნესის განვითარების ცენტრი „კავკასია“ ფერმერებთან ერთად ახდენს.  ორგანიზაცია სოფლად მცხოვრებ მოსახლეობას ახალი ტექნოლოგიების დანერგვაში  ეხმარება  და  სხვადასხვა სახის კონსულტაციასაც უწევს.  ცენტრის ხელმძღვანელის თქმით, მნიშვნელოვანია ზედმეტი დანახარჯების გარეშე,  ფერმერებმა ბევრად მეტი რძე აწარმოონ,  ამისათვის კი  გლეხებმა თანამედროვე სტანდარტებს ფეხი უნდა აუწყონ.

ადგილობრივ ფერმერებს თანამედროვე ტექნოლოგიების დანერგვაში უცხოელი სპეციალისტებიც ეხმარებიან. საფრანგეთის მოქალაქე ალინ ბრაუნ შტეფერი   საქართველოს ბიზნესის განვითარების ცენტრში სწორედ ამ მიზნით იმყოფება.

ფერმერებმა მიდგომები, რომ უნდა შეცვალონ ამაზე სოფლის მეურეობის სამინისტროს სამცხე–ჯავახეთის რეგიონული სამმართველოს წარმომადგენლებიც თანხმდებიან.  სამმართველოს უფროსის თქმით, დაწესებულებაში ჩამოყალიბებულია ექსტენციის სამსახური, რომლის პირდაპირი მოვალეობა ახალი ტექნოლოგიების კუთხით, ფერმერების ცნობიერების ამაღლებაა. გარდა ამისა, რეგიონებში შექმნილია, სადემონსტრაციო ნაკვეთები, სადაც ფერმერებისთვის ღია კარის დღეები ეწყობა. ნანა ზუბაშვილის თქმით, აღნიშნულის მიზანი, სოფლის მაცხოვრებელთათვის მოტივაციის შექმნაა, რომ  მათ სიახლე საკუთარ მეურნეობაში დანერგონ. მისივე თქმით, ახალი ტექნოლოგიები მხოლოდ ტექნიკის შეცვლას არ გულისხმობს.

სოფლის მეურეობის სამინისტროს სამცხე–ჯავახეთის რეგიონული სამმართველოს უფროსი თქმით, მაგალითად, წვეთოვანი სარწყავი სიტემის დადგმა, თავდაპირველად დიდ თანხებს საჭიროებს,  თუმცა, მისი შემდგომი გამოყენების  დროს, ფერმერი მის ეფექტურობას ხვდება და მოგებასაც ნახულობს. ნანა ზუბაშვილი იმასაც აღნიშნავს, რომ მცირე თანხებით,  ოჯახურ პირობებში  სხვადასხვა სახის გამოსაყენებელი ტექნოლოგიის შექმნა შესაძლებელია. ამიტომ,  სამმართველოს უფროსი ფერმერებს მოუწოდებს, რომ  სიახლეებს ფეხი აუწყონ და საკუთარი მეურნეობის განვითარებაზე უფრო მეტად იზრუნონ.