30 წელი ფერმერულ მეურნეობაში და აგრარული დარგის განვითარებისათვის მიღებული ჯილდო. სოფელ სხვილისის მკვიდრი მუგო მოვსესიანი მეკარტოფილეობის, მებოსტნეობისა და მეხილეობის განვითარებით არის დაკავებული. იგი „ფერმერის საათთან“ საკუთარი საქმიანობისა და გეგმების შესახებ საუბრობს.
30–მდე ახალი ჯიშის კარტოფილი და მაღალ მოსავლიანობაზე ორიენტირებული ფერმერი. მუგო მოვსესიანმა ამ სფეროში მუშაობა 30 წლის წინ დაიწყო. სხვილისის მკვიდრს კარტოფილის ახალი ჯიშები დღეისათვის ჰოლანდიიდან და გერმანიიდან შემოაქვს, რომელსაც მესხეთის კლიმატურ პირობებზე ცდის. მესხ ფერმერს კარტოფილი ჯერ მხოლოდ, 2 ჰექტარზე მოჰყავს. ამბობს, რომ მოსავალი ყოველთვის საუკეთესოა. წელს კარტოფილის საერთო რაოდენობამ 20 ტონა შეადგინა. ფერმერი კულტურის დათესვამდე, ყოველ გაზაფხულზე ნიადაგის გამოკვლევას აწარმოებს.
მეკარტოფილეობის გარდა, მუგო მოვსესიანი დაინტერესებულია მეხილეობის განვითარებითაც. ამ ბაღში იტალიიდან და ჰოლანდიიდან ჩამოტანილი 13–მდე ჯიშის, ვაშლისა და მსხლის 80–მდე ნერგია, რომელიც უკვე ოთხი წელია იზრდება. ფერმერი ამბობს, რომ ნერგების დარგვიდან ორ წელიწადში ხეხილმა ნაყოფი გამოიღო და ახლა მის რეალიზებას ეწევა. მუგო მოვსესიანი ირწმუნება, რომ ვაშლისა და მსხლის ახალი ჯიშები მაღალი მოსავლიანობითა და ხარისხით გამოირჩევა. გარდა ამისა, ადვილად ეგუება რეგიონის მკაცრ კლიმატურ პირობებს.
მუგო მოვსესიანი თავდაპირველად ოჯახის წევრებთან ერთად, საკუთარ მეურნეობას ამუშავებდა, მოგვიანებით კი არასამთავრობო ორგანიზაციების დახმრებით საქართველოში ხილ–ბოსტნეულის ახალი ჯიშების შემოტანა და მისი თანამედროვე ტენოლოგიებით განვითარება დაიწყო.
კერძო მეურნეობის გარდა, მუგო მოვსესიანს სამი კოოპერატივი აქვს ჩამოყალიბებული და პარტნიორებთან ერთად მეფუტკრეობის, მეცხვარეობისა და მეკარტოფილეობის მიმართულებით მუშაობს. გარდა ამისაა, აქტიურადაა ჩართული სხვადასხვა არასამთავრობო ორგანიზაციაში და რეგიონის მასშტაბით დაინტერესებულ ფერმერებს კონსულტაციებს უწევს. აგრარული დარგის განვიტარებაში შეტანილი წვლილისათვის მუგო მოვსესიანი, სოფლის მეურნეობის მინისტრმა 20 ნოემბერს დააჯილდოვა. წარმატებული ფერმერის საქმიანობაზე მისი მეგობრებიც საუბრობენ.
მუგო მოვსესიანი საკუტარი საქმიანობის გაფართოებას აპირებს და ამბობს, რომ მომავალში ხილ–ბოსტნეულის მორწყვისათვის წვეთოვანი სისტემის დამონტაჟებას აპირებს, რადგან მისი თქმით, სხვილისში რწყვის პრობლემა მწვავედ დგას. წარმატებული ფერმერი ამბობს, რომ იმ შემთხვევაში თუ საქართველოსთვის ევროკავშირის ბაზარი ხელმისაწვდომი იქნება, მისი პროდუქცია, შესაბამისი პროცედურების გასავლელად მზად არის. თუმცა მუგო მოვსესიანს კარტოფილისა და ხილ–ბოსტნეულის რეალიზება არც საქართველოს ბაზარზე უჭირს. იგი შემოდგომის პერიოდშივე ერთ კილოგრამს ლარად და 30 თეთრად ჰყიდის. ყოველწლიურად სამეურნეო საქმიანობიდან მოწეული პროდუქტიდან კი 15 000–მდე ლარის სარგებელს იღებს.
