სამცხე–ჯავახეთში  ჟურნალისტებისთვის აგროტური მოეწყო. მედიის წარმომადგენლებმა რეგიონში არსებული სასოფლო–სამეურნეო კოოპერატივები და ფერმერთა მომსახურების ცენტრები მოინახულეს.

პირველი ფერმერული გაერთიანება, რომლის საქმიანობასაც ჟურნალისტები ადგილზე გაეცნენ, ახალქალაქის მუნიციპალიტეტის სოფელ ხულგუმოში მდებარე კოოპერატივი  „ხულგუმოა“, რომელიც მეკარტოფილეობის კუთხით მუშაობს. 2015 წელს 20 ადგილობრივი, მათგან 16 ქალი გაერთიანდა და ფერმერული მეურნეობა ჩამოაყალიბა.   ENFARD-ის პროექტის ფარგლებში კოოპერატივს 14 700 ევრომდე ღირებულების ტექნიკა გადაეცა.

კოოპერატივი „ხუთი ვარსკვლავი“ მეკატროფილეობას 2007 წლიდან მისდევს, სასოფლო სამეურნეო გაერთიანების სტატუსი 2014 წელს მიიღო და საქმიანობა უფრო გააფართოვა. ამ დროისათვის კოოპერატივში 12 ადგილობრივია გაწევრიანებული. ხარისხიანი თესლისა და სასუქის არქონის გამო, ფერმერები მაღალი მოსავლის მიღებას ვერ ახერხებდნენ. ENFARD-ის პროექტის ფარგლებში კი მათ 15 500 ევროს ღირებულების სათესლე მასალა და სასუქი შეიძინეს.

მედიატურის ფარგლებში ჟურნალისტები ახალქალაქის ფერმერმერთა მომსახურების ცენტრსაც ესტუმრნენ, რომელიც დღეისათვის 4 000-მდე ადგილობრივს ემსახურება. აქ ბოსტნეული და ბაღჩეული კულტურების თანამედროვე სათესლე მასალა,  ვეტერინარიული მედიკამენტები, მცენარეთა დაცვის საშუალებები და სასუქებია წარმოდგენილი.  სადისტრიბუციო სისტემის ამუშავებისა და ფერმერებისთვის სერვისების ხელმისაწვდომობის მიზნით, პროექტის ფარგლებში მათ სპეციალური ავტომობილი  შეუძინეს. გრანტის თანხამ 7 100 ამერიკული დოლარი შეადგინა.

დასკვნითი ღონისძება ახალციხეში შპს „მექანიზატორში“ გაიმართა, სადაც მედიის წარმომადგენლები Mercy Corps-ის მიერ ორგანიზებულ სასოფლო სამეურნეო გამოფენას დაესწრნენ. რეგიონში რეგისტრირებულმა კოოპერატივებმა  და ფერმერთა მომსახურების ცენტრებმა საკუთარი პროდუქცია წარმოადგინეს.

ორმედიატური რეგიონში სოფლისა და სოფლის მეურნეობის განვითარების ევროკავშირის სამეზობლო პროგრამის – ENFARD-ის ფარგლებში მოეწყო.