ვალეში ფერმერებმა ტონობით კომბოსტო ისევ გადაყარეს. სოფლის მეურნეობის სფეროს წარმომადგენლები პრობლემის გადაჭრის გზას ბოსტნეული კულტურების გამრავალფეროვნებაში ხედავენ.

ვალის მოსახლეობამ მიმდინარე წელს ტონობით კომბოსტო ისევ გადაყარა. იმ იმედით, რომ კულტურის გასაყიდი ფასი მოიმატებდა, ადგილობრივების უმეტესმა ნაწილმა გაზაფხულამდე შეინახა. კომბოსტოს ღირებულებამ ზრდის ნაცვლად კლება დაიწყო. ფერმერების უმეტესმა ნაწილმა კულტურა ნაკლებ ფასად აღარ გაყიდა. შედეგად პროდუქტი სარდაფებში დაულპათ. ვალელები ამბობენ, რომ ზარალი დიდია. ადგილობრივები გამოსავალს სარეალიზაციოდ მეზობელ ქვეყნებში გასვლაში ხედავენ.

წელს რომ ვალელებმა კონბოსტოს რეალიზება ვერ მოახერხეს, ამაზე ახალციხის გამგებლის წარმომადგენლის თანაშემწეც საუბრობს. ქიშვარდი ხითარიშვილის თქმით, 2015 წლის შემოდგომის მოსავალის თითქმის 100 პროცენტი გადაიყარა. წინა წლებისგან განსხვავებით პროდუქტი რესპუბლიკის ფარგლებს გარეთ არ გავიდა, რაც აღნიშნული შედეგის ერთ–ერთი მიზეზია – მიაჩნია გამგებლის წარმომადგენლის თანაშემწეს ვალის ადმინისტრაციულ ერთეულში.

ყოველწლიურად ახალციხის მუნიციპალიტეტის მასშტაბით, 8 000 დან 10 000 ტონამდე კომბოსტოს მოსავალი მოჰყავთ. მიმდინარე წელს კი მხოლოდ 5 000 ტონის რეალიზაცია მოხდა. სოფლის მეურნეობის სამინისტროს სამცხე–ჯავახეთის რეგიონული სამმართველოს უფროსი განმარტავს, რომ მოსახლეობა ყოველწლიურად, მხოლოდ ერთი სახეობის კომბოსტოს და ისიც ჭარბი რაოდენობით თესავს. პროდუქტს დაბალ ფასში არ ყიდის, რის გამოც არასასურველი შედეგი დგება. ნანა ზუბაშვილის თქმით, პრობლემას ქმნის ის ფაქტიც, რომ ვალის კომბოსტო კახეთიდან შემოტანილ ბოსტნეულს კონკურენციას ვერ უწევს.

სოფლის მეურნეობის სამინისტროს რეგიონულ სამმართველოში პრობლემის გადაწყვეტის ყველაზე რეალურ გზად, ბოსტნეულის გამრავალფეროვნებას მიიჩნევენ. გარდა ამისა, მოსახლეობას კულტურების ზომიერი რაოდენობით დათესვას ურჩევენ.

ავტორები: ირაკლი ბახტურიძე, თიკო კურტანიძე, ბექა ზედგინიძე.