ახალციხის ციხის აგრონომი – გამწვანების სპეციალისტი რეზო გიქოშვილი წლებია მევენახეობას მისდევს. მის საზაფხულო სახლის ეზოში დღეისათვის ათეულობით მესხური ვაზი ხარობს.

გიქოშვილების საზაფხულო სახლის ეზოს დღეს კიდევ ორი ძირი ვაზი შეემატა. ნამყენი „ჩიტისკვერცხა თეთრი“ ორ წელიწადში უკვე ნაყოფს მოისხამს.

ახალციხიდან 35 კილომეტრის დაშორებით, ზღვის დონიდან 957 მეტრზე, რეზო გიქოშვილმა ათეულობით ჯიშის ვენახი გაახარა. თავდაპირველად კლდიანი ტერიტორია შეიძინა, ადგილზე მიწა დაყარა, მოასწორა და 2 მეტრამდე ნაყარ ნიადაგზე საცდელად რამდენიმე ძირი ვაზი დარგო. ბუნებრივ პირობებს ვენახი კარგად შეეგუა, შესაბამისად დღეისათვის გიქოშვილების კუთვნილ ტერიტორიაზე 120 ძირი ვაზი ხარობს. თავდაპირველად ნაჩუქარი ვენახი გაახრა, ზედა ვარძიიდან ბაგრატ დევნოსაძემ ერთი რიგი მესხური ვაზით დაასაჩუქრა, საქმიანობაც სწორედ აქედან დაიწყო.

ვაზის სიყვარულმა რეზო გიქოშვილს სამცხე–ჯავახეთი შემოატარა. ზოგიერთი ჯიში თავადვე მოიძია, ზოგი შეიძინა, ზოგი კი აჩუქეს. ყველა მათგანს თავი ერთ ტერიტორიაზე მოუყარა. დღეისათვის გიქოშვილების საზაფხულო სახლის ეზოში, ძირითადად მესხური ვაზი ხარობს, ბოლო ორი წელიწადია ადგილი დაიკავა ევროპულმა ვენახმაც, რომელიც დიდი მტევნებით ხასიათდება და ძირითადად სუფრისთვის გამოიყენება.

„მოვლა იმდენჯერ სჭირდება, რამდენჯერაც ვენახი გეტყვის“ – ამბობს ახალციხელი ფერმერი. მისი თქმით, ვაზი კახეთში თუ ათ დღეში ერთხელ იწამლება, კლიმატური პირობებიდან გამომდინარე, ახალციხის მუნიციპალიტეტში მას წამლობა 5–6–ჯერ სჭირდება.

სამცხე–ჯავახეთის ტერიტორიაზე დაახლოებით ათიათასამდე ძირი ვენახი აქვს დარგული. საკუთარ ტერიტორიის შემდეგ ვაზი მეგობრებსაც გაუხარა. გარდა ამისა, დღეისათვის ახალციხის ციხე, ტურისტებში ტერასული მევენახეობით თავს რომ იწონებს, სწორედ რეზო გიქოშვილის ინიციატივით გაშენდა.

რეზო გიქოშვილმა 20 წლიანი გამოცდილების შემდეგ გადაწყვიტა მევენახეობაზე წიგნი გამოეცა. იდეა 2015 წელს განახორციელა და „მესხური ვაზი და ღვინო“ გამოსცა. წიგნში აღწერილია ნიადაგის დამუშავების ტექნოლოგიები, მესხური ჯიშები, მათი გახარების გზები და სხვა.

სამომავლოდ მევენახე საყვარელი საქმიანობის გაგრძელებას კვლავ ახალციხის ციხის ტერიტორიაზე გეგმავს. იდეა, კომპლექსის ზედა ნაწილში ადგილობრივი ჯიშის ვენახი ტერასებზე გაეშენებინა,  თავად ვერ განახორციელა, ამიტომ გადაწყვიტა მესხური ვაზის გახარებაში ახალგაზრდა მევენახეს გიორგი ნათენაძეს  დაეხმაროს.

ავტორები: თიკო კურტანიძე,  ნანა ინასარიძე