რა შედეგით დასრულდება 2016 წლის საპარლამენტო არჩევნები? – წინასაარჩევნოდ ყველაზე აქტუალური კითხვაა, რომელზეც პასუხის გაცემა რთულია.
წინასწარ პროგნოზებს ვერ აკეთებენ ახალციხეში მოქმედი არასამთავრობო ორგანიზაციების წარმომადგენლები. „დემოკრატ მესხთა კავშირის“ ხელმძღვანელი, წინა წლების გამოცდილებიდან გამომდინარე, სამცხე–ჯავახეთში ყველაზე კრიტიკულ წერტილად, ახალქალაქი–ნინოწმინდის მაჟორიტარულ ოლქს მიიჩნევს. გიორგი ანდღულაძე ჯავახეთში კონფლიქტურ სიტუაციებს არ გამორიცხავს.
მეორე ტურს არ გამორიცხავს არც ასოციაცია „ტოლერანტის“ ხელმძღვანელი, თუმცა გიორგი ანდღულაძისგან განსხვავებით, ცირა მესხიშვილი ხელახალ არჩევნებს სამცხე–ჯავახეთის ერთ ოლქში და მერების კანდიდატებს შორის პროგნოზირებს. მისი ვარაუდით წელს ამომრჩევლების მაღალი აქტივობა დაფიქსირდება, რადგან მოსახლეობაში ინფორმირებულობის დონე მაღალია.
წინასაარჩევნო პერიოდს ყველზე აქტიურად აფასებს 37–ე ახალციხის საოლქო საარჩევნო კომისიის თავმჯდომარე. თეა გავაშელი აღნიშნავს, რომ ზოგადად, საპარლამენტო არჩევნები ყველა სხვა არჩევნებისგან განსხვავდება. მისივე თქმით, აქტიურობა შეიმჩნება, როგორც პოლიტიკური პარტიების წარმომადგენლებისგან, ასევე რიგირთი მოქალაქეებისგან.
2016 წლის საპარლამენტო არჩევნები დამოუკიდებელი საქართველოს ისტორიაში მეცხრედ იმართება. მერვე მოწვევის საპარლამენტო არჩევნების დროს მმართველი ძალა პირველად დამარცხდა.
ავტორები: თიკო კურტანიძე, რამაზ ალავიძე.
