სოფელ მოხეში მუსლიმების შემდეგ, ღია ცის ქვეშ ლოცვა მართლმადიდებლებმაც დაიწყეს. სადავო შენობასთან მშვიდობის სავედრებელი პარაკლისი ზარზმის მონასტრის წინამძღვარმა მრევლის თხოვნით აღავლინა.

ადგილობრივი მართლმადიდებლები ამბობენ, რომ მათი უფლებების დასაცავად არაფერი კეთდება, ამიტომ ხელისუფლებისგან ყურადღების მიქცევა ამ ფორმით გადაწყვიტეს.

მშვიდობის სავედრებელი პარაკლისი ზარზმის მამათა მონასტრის წინამძღვარმა, ღია ცის ქვეშ, 17 დეკემბერს გადაიხადა. არქიმანდრიტ ნიკოლოზის განმარტებით, მოსაზრება, რომ მართლმადიდებლებს შენობასთან დაკავშირებით პრეტენზია არ გააჩნიათ,  მართებული არ არის.  მისივე თქმით, სოფლის ცენტრში არსებული ობიექტი მიმდებარე სოფლებიდან მოტანილი ქვებით არის აგებული, რომელიც თავის დროზე ეკლესიას ეკუთვნოდა.  ამიტომ არქიმანდრიტი თვლის, რომ სადავო შენობის მესაკუთრეები მართლმადიდებლები არიან.

მოხეში ღია ცის ქვეშ სალოცავად, ადგილობრივი მუსლიმები, ყოველდღიურად იკრიბებიან. ამბობენ, რომ ისინი ლოცვას არავის უშლიან, რადგან ღმერთმა სამყარო სწორედ ამისთვის შექმნა. მათივე თქმით, ღია ცის ქვეშ ლოცვის შეწყვეტას იქამდე არ აპირებენ, სანამ სადავო შენობის კუთვნილების დასადგენად, სახელმწიფოსგან ქმედითი ნაბიჯები არ გადაიდგმება.

მართლმადიდებლები პარაკლისის გადახდას, სადავო შენობასთან ყოველ შაბათს აანონსებენ. ყოველდღიურად, დღის პირველ საათზე ღია ცის ქვეშ ლოცვას გააგრძელებენ მუსლიმებიც.  ორივე მხარე პროტესტის ამგვარი ფორმით გამოხატვას შედეგის მიღწევამდე გეგმავს, თუმცა დაადგენს თუ არა სახელმწიფო შენობის მესაკუთრეს  – ეს ჯერჯერობით უცნობია.

მართლმადიდებლების ლოცვის კადრები “მეცხრე არხს” ადგილობრივმა გიორგი რეხვიაშვილმა მიაწოდა. 

თიკო კურტანიძე