Ախալցիխեում հանրային տրանսպորտը անցնում է միայն կենտրոնական փողոցներով: Մի քանի տարի է, ինչ հանրային տրանսպորտում փոփոխություններ չեն գրանցվել: Քաղաքից հեռու ապրող մարդիկ դժվարանում են հասնել կենտրոն:

Հռիփսիմե Ստամբոլցյանը ապրում է Ախալցիխեի Տաբիձե փողոցում: Թոշակառու կինը քաղաք հասնելու համար, ստիպված է քաղաքային ավտոբուսներ կանգնեցնել:

«Կենտրոնական ճանապարհ հասնելու համար ստիպված ենք անցնել մեկ կիլոմետր հեռավորություն: Երկաթգիծը պետք է կտրենք, անցնենք գնացքների տակով: Հարկավոր է նշանակել հանրային տրանսպորտ: Գոնե օրվա ընթացքում 2 անգամ երթևեկի, կարևորը գիտենանք, որ երեխաները անվտանգ դպրոց կգնան-կգան»,- ասում է Հռիփսիմե Ստամբոլցյանը:

Հանրային տրանսպորտի անհրաժեշտությունը զգում է նաև նրա հարևան՝ Սերգո Էլոյանը, սակայն կարծում է, որ մի քանի ուղեկիցների համար, նրանց թաղամասում նոր տրանսպորտային գիծ չեն ավելացնի:

Տաբիձեից բացի, հանրային տրանսպորտ նշանակել պահանջում են նաև Զարզմա փողոցի բնակիչները: Տեղացիներն ասում են, որ նրանց թաղամասից հանրային տրանսպորտի ուղեկից միշտ կլինի:

«Ցրտին երեխան անցնում է 3 կմ հեռավորություն, ինչպե՞ս պետք է սովորեն: Եթե գիտե-նանք, որ ամեն օր տրանսպորտ կլինի, անպայման կսպասենք: Տարեց մարդիկ անգամ թոշակ ստանալու չեն կարող գնալ, միշտ խնդրում ենք հարևաններին, որ տանեն»,- ասում է Մեդիկո Զեդգինիձեն:

Թամիլա Գզիրիշվիլին ամեն առավոտ երեխաներին տաքսիով է դպրոց տանում: Երեխաների անվտանգության համար, փողոցի բնակիչները պայմանավորվել են, որ տաքսիին, ով տանում է 5-6 աշակերտ, գումարը հերթականությամբ կվճարեն:

Գոգեբաշվիլի փողոցը գտնվում է քաղաքի պատմական մասում: Ռաբաթի թաղամասի բնակիչները պահանջում են նշանակել հանրային տրանսպորտ: Տեղացիները քաղաքի կենտրոնից տուն հասնելու համար ստիպված են քայլել բարձունքով:

«Ասթմա ունեմ, որի պատճառով դժվարանում եմ քայլել: Բարձունքով քայլելիս 5 անգամ հանգստանում եմ: Հիմնականում սպասում եմ անցորդներին, որ տանեն: Տրանսպորտ չլինելու պատճառով, խուսափում եմ քաղաք գնալ, միայն թոշակի համար եմ գնում»,- պատմում է Ռաբաթում բնակվող Վլադիմիր Հակոբյանը:

Ախալցիխեի մունիցիպալիտետի քաղաքապետարանում ասում են, որ հանրային տրանսպորտի ուղղությունների և գյուղերում նշանակելու մասին դեռևս մտածում են: Ինքնակառավարությունում դեռ չգիտեն, որ փողոցները կավելանան հանրային տրանսպորտի ուղղությանը:

Ախալցիխե քաղաքի բնակչությանը ծառայում է ՍՊԸ «Ջեոտիվին»: Ըստ ընկերության տնօրեն՝ Նուգզար Մամուկաշվիլիի, հանրային տրանսպորտն անցնում է միայն քաղաքի կենտրոնական փողոցներով: Քաղաքին առավոտյան 3, իսկ երեկոյան 2 ավտոբուս է ծառայում: Նա ասում է, որ մոտ ապագայում փոփոխություններ չեն ծրագրում: