Վրաստանի տարածաշրջանային զարգացման և ենթակառուցվածքների նախարարության ավտոճանապարհների դեպարտամենտից հայտնում են, որ առատ ձյան և օդերևութաբանական ծանր պայմանների պատճառով ամբողջ երկրում իրականացվում են ճանապարհների մաքրման աշխատանքներ շուրջօրյա ռեժիմում, թափվում է ավազ-աղ խառնուրդ և անհրաժեշտ բոլոր միջոցառումները ձեռնարկվել են երթևեկության անցանելիությունը պահպանելու համար:

Միջազգային նշանակության Մցխեթա-Ստեփանծմինդա-Լարս ավտոճանապարհի Մլեթա-Գուդաուրի և Ստեփանծմինդա-Լարս հատվածներում ինտենսիվ մաքրման աշխատանքների արդյունքում տրանսպորտային միջոցների տեղաշարժն ազատ է։

Միաժամանակ, ըստ Շրջակա միջավայրի ազգային գործակալության, Գուդաուրի-Կոբի հատվածում պահպանվում է ձնահոսքի վտանգի բարձր մակարդակը, ինչի պատճառով այս հատվածով արգելված է բոլոր տեսակի տրանսպորտային միջոցների տեղաշարժը։

Ներքին պետական նշանակության Ալպանա-Ցագերի և Վազիանի-Գոմբորի-Թելավի ավտոճանապարհներին երթևեկությունն ազատ է։ Այս պահին ակտիվորեն մաքրման աշխատանքներ են իրականացվում Սաչխերե-Օնի ճանապարհին, որտեղ երեկ մեծ քանակությամբ ժայռաբեկոր է իջել և բոլոր տեսակի տրանսպորտային միջոցների տեղաշարժն արգելվել է։

Շարժման հատուկ ռեժիմներ են գործում նաև հետևյալ ճանապարհներին. Առատ ձյան, ցածր ջերմաստիճանի և վատ տեսանելիության պատճառով միջազգային ճանապարհի կմ51-կմ96 Խաշուրի-Ախալցխա-Վալե հատվածը փակ է կցորդիչով, կիսակցորդիչով և 30-ից ավելի տեղ ունեցող տրանսպորտային միջոցների համար:

Միջազգային նշանակության Ախալցխա-Նինոծմինդա կմ1-կմ112 հատվածում օդերևութաբանական բարդ պայմանների պատճառով (ձյուն, բուք, վատ տեսանելիություն) կցորդիչով, կիսակցորդիչով և 30-ից ավելի տեղ ունեցող տրանսպորտային միջոցների համար տեղաշարժն արգելված է, իսկ մնացած տիպի ավտոտրանսպորտի համար երթևեկությունը բաց է։

Առատ ձյան և ցածր ջերմաստիճանի պատճառով Գոմի-Սաչխերե-Ճիատուրա-Զեստափոնի կմ1-կմ52 հատվածի և Քութայիսի-Տղիբուլի-Ամբրոլաուրի ավտոճանապարհի կմ39-կմ62 հատվածում երթևեկությունն արգելված է կցորդիչով, կիսակցորդիչով և 30-ից ավելի տեղ ունեցող տրանսպորտային միջոցների համար։ Ճանապարհի մնացած հատվածում երթևեկությունն ազատ է։

Բքի և վատ տեսանելիության պատճառով ներքին պետական ​​նշանակության Կոդա-Փարցխիսի-Մանգլիսի-Ծալկա-Նինոծմինդա կմ94-կմ110 ճանապարհահատվածում (Փարավանի լեռնանցք) երթևեկությունն արգելված է։ Ճանապարհի մնացած հատվածում երթևեկությունն ազատ է։

Մերկասառույցի պատճառով ներքին պետական նշանակության Զուգդիդի-Ջվարի-Մեստիա-Լասդիլի ավտոճանապարհի կմ70-կմ186 (Խայշի-Ուշգուլի) հատվածում արգելվում է կցորդիչով, կիսակցորդիչով և 30-ից ավելի տեղ ունեցող տրանսպորտային միջոցների համար։

Ավտոճանապարհային վարչությունը հորդորում է բնակիչներին ձմռանը երթևեկել համապատասխան անվադողերով, պատշաճ տրանսպորտով և ենթարկվել ավտոճանապարհներին սահմանված ռեժիմներին։