Հարցվածների մեծ մասն այժմ ավելի քիչ ֆինանսական հնարավորություններ ունի, քան 5 տարի առաջ. NDI

Լուրեր

16.09.2022

«Ազգային ժողովրդավարական ինստիտուտի» (NDI) հետազոտության համաձայն՝ հարցված բնակչության մեծամասնությունը երկրի տնտեսական վիճակը գնահատում է «վատ»։

Մասնավորապես, հարցվածների 55%-ը նշում է, որ Վրաստանի տնտեսությունը ներկայումս վատ վիճակում է: Ըստ 38%-ի՝ միջին և միայն 4%ն է հայտնում, որ ամեն ինչ լավ է։

Սակայն, ըստ հետազոտության, հարցված բնակչության մեծ մասն այժմ ավելի քիչ ֆինանսական հնարավորություններ ունի, քան 5 տարի առաջ։ Հարցմանը, մասնավորապես, պատասխանել են՝ «5 տարի առաջվա համեմատ՝ այժմ ավելի շատ, նույնքան, թե՞ քիչ ֆինանսական հնարավորություններ ունեք», որին 45%-ը պատասխանել է, որ ավելի քիչ հնարավորություն ունի; 34%-ն ասում է, որ ունի նույն հնարավորությունները: Իսկ հարցվածների միայն 20%-ն ունի ավելի շատ ֆինանսական հնարավորություններ։

Բացի այդ, հարցված քաղաքացիների յուրաքանչյուր երրորդը նշել է, որ հաճախ գումար չի ունենում ընտանիքի համար սնունդ գնելու համար։ Ավելի հստակ՝ «Վերջին 12 ամիսների ընթացքում քանի՞ անգամ չեք ունեցել բավարար գումար՝ ձեր կամ ձեր ընտանիքի համար սնունդ գնելու համար», պատասխանները բաշխվել են հետևյալ կերպ՝ երբեք՝ 39%; Ամեն ամիս կամ ավելի հաճախ - 30%; Ավելի քիչ, քան ամեն ամիս՝ 29%:

NDI-ն ուսումնասիրում է հասարակական կարծիքը՝ օգնելու շահագրգիռ կողմերին հասկանալ և լուծել քաղաքացիներին հուզող խնդիրները՝ հիմնվելով ճշգրիտ, անաչառ և վիճակագրորեն հիմնավորված տվյալների վրա: Ուսումնասիրության նպատակն է նպաստել բնակչության կարիքներին առավել հարմարեցված քաղաքականության և կառավարման ձևավորմանը: Նշված զեկույցը հիմնված է Վրաստանի չափահաս բնակչության դեմ առ դեմ հարցման արդյունքների վրա, որն անցկացվել է հուլիսի 14-ից օգոստոսի 15-ը ողջ երկրում (առանց գրավյալ տարածքների)։ Օգոստոսյան հարցումը ներառում է ընդհանուր առմամբ 2104 ավարտված հարցազրույց: Հարցման մեջ սխալի միջին սահմանը +/- 2 տոկոս է: