«Շինարարության ոլորտում նոր նախագծերի ֆինանսավորումը բանկերի մի մասն այժմ դադարեցրել է», - այս մասին հայտնել է «Արսի» ընկերության տնօրեն Բեսո Օրթոիձեն։

Օրթոիձեի խոսքով՝ պատճառը երկրում ստեղծված իրավիճակն է, որի ֆոնին բանկային ոլորտը ռիսկեր է տեսնում նոր նախագծերի վարկավորման մեջ։

«Փետրվարից պահանջարկն ակտիվացել է, նույն տեմպերը պահպանվում են նաև մարտին։ Դեկտեմբերին շուկայում առկա բացասական միտումներն այժմ կարծես թե չեզոքացել են, սակայն ընկերություններում բացասական սպասումները դեռ պահպանվում են, քանի որ երկրում կայունության հեռանկարներն անորոշ են, մեծ հարցականներ կան, ինչը զգալի է նաև բանկային ոլորտում։ Նրանք ռիսկեր են տեսնում, և դա հաստատում է այն հանգամանքը, որ երկու խոշոր բանկ արդեն դադարեցրել է նոր նախագծերի ֆինանսավորումը»,- նշել է Բեսո Օրթոիձեն։

Նրա խոսքով՝ վարկավորման նվազման հետևանքով հնարավոր է, որ նոր նախագծերն այն տեմպերով չսկսվեն, ինչպես նախորդ տարիներին։

«Ապագա նախագծերի մասով սպասումներն ավելի մտահոգիչ են։ Երբ խոսք է գնում նոր նախագծեր սկսելու մասին, որոշ ընկերություններ համարձակ են, մյուսները՝ զգուշավոր։ Նրանք, ովքեր համարձակ են արտահայտվում, կարող են դժվարություններ ունենալ կապիտալի շուկային հասանելիության հարցում, քանի որ ֆինանսական կառույցները՝ բանկերը, այժմ զգուշորեն են վերաբերվում նոր նախագծերի ֆինանսավորմանը։ Արդեն ֆինանսավորված ընթացիկ նախագծերը կշարունակվեն, սակայն հնարավոր է, որ նոր նախագծերի ֆինանսավորումից բանկերը ձեռնպահ մնան։ Այս ամենը կարող է երկարաժամկետ կտրվածքով դանդաղեցնել առաջարկի աճը․ նոր նախագծերը գուցե այն արագությամբ չսկսվեն, ինչպես նախկին տարիներին», - ասել է Բեսո Օրթոիձեն։