უკანონოდ შევიდნენ, ხელის შეშლა იყო ყველანაირად - არტაშ პეტროსიანი

ინტერვიუ

01.03.2024

ავტოსადგურის ირგვლივ დავა გრძელდება. მიუხედავად იმისა, რომ ახალციხის რაიონულმა სასამართლომ, 28 თებერვალს, გადაწყვეტილება ავტოსადგურის მფლობელი შპს „მგზავრის“ მეწილეების სასარგებლოდ მიიღო. სასამართლოს გადაწყვეტილებას არ ეთანხმება შპს „ვიპ ტრანსის“ხელმძღანელი და მოიჯარე არტაშ პეტროსიანი, რომელიც საკუთარი სიმართლის დასადგენად სამართლებრივ ბრძოლას განაგრძობს.

ახალციხის ავტოსადგურზე მეიჯარეებსა და მოიჯარეს შორის დაპირისპირება, 2023 წლის 5 სექტემბერს დაიწყო. შპს "მგზავრის" ინფორმაციით, მოიჯარე შპს "ვიპ ტრანსმა" სამი თვის განმავლობაში თანხა არ გადაიხადა, კანონის მიხედვით კი სამი თვის შემდეგ მფლობელებს უფლება აქვთ შეწყვიტონ ხელშეკრულება. შედეგად შპს "მგზავრის" 15-მა მეწილემ შეადგინა ოქმი და შპს "ვიპ ტრანსს" შეუწყვიტა ხელშეკრულება, თუმცა მოიჯარემ შენობის დატოვებაზე უარი განაცხადა.

მოიჯარე შპს "ვიპ ტრანსის" დირექტორმა არტაშ პეტროსიანმა განაცხადა, რომ მეწილეები და ადმინისტრაცია არ აძლევდა სრულყოფილად მუშაობის საშუალებას, ამის გამო კი თავს დაზარალებულად ცნობს და მეწილეებს სასამართლოში უჩივის.

- ბატონო არტაშ, რა გახდა დაპირისპირების მიზეზი - თანხის გადაუხდელობა?

თანხის გადაუხდელობის გამო უთანხმოება არ მომხდარა. ეს ტყუილია. პირველი: ხელშეკრულება დაიდო 25 ნოემბერს და ჩვენ წინსწრებით ვიხდიდით თანხას და მეორე: მათ რომ გატეხეს და შევიდნენ, იყო 5 სექტემბერი, პოლიციაც მოვიდა, ჟურნალისტებიც იყვნენ. მას მერე დაკეტილია სადგური. ჩვენი ბოლო ქვითარი სალარო აპარატიდან არის 3 სექტემბრის. რატომ ფიქრობენ, რომ სექტემბერში დაიკეტა და სექტემბრის ფული უნდა გადავიხადო? თუ აღარ ვმუშაობ მე შენი მიზეზით, არ მიშვებ რომ ვიმუშაო, 6 სექტემბერს დადგნენ კარებთან და მოლარე არ შეუშვეს, რომ ემუშავა, სექტემბრის თანხა რატომ უნდა გადავიხადო?

- მაშინ რატომ დაუპირისპირდით?

ეგ სადგური გაკოტრებული იყო. ჩვენ დეკემბერი ვიმუშავეთ, ავაწყეთ საქმე, თვითონაც მაქებდნენ და იანვარში ამის გამო შემომთავაზეს, რომ გადავსულიყავი და მენეჯერად მემუშავა ხელფასზე, ხელშეკრულება კი შემეწყვიტა. ნატალია ჩიხლაძე პერიოდულად რეკავდა და კითხულობდა საქმის ვითარებას, თან სულ აყოლებდა, თუ არ გაწყობს შევწყვიტოთ ხელშეკრულებაო, ვითომ ჩემზე ფიქრობდა. მე ვუთხარი რომ ბიზნესის აწყობა მინდოდა და არა ხელფასზე მუშაობა. ამის მერე დაიწყო ჩხუბი, ყველაფერს აკეთებდნენ რომ ვეღარ მემუშავა და ჩემი ნებით, სასამართლოსა და იუსტიციის გარეშე, წამოვსულიყავი და მე დამბრალებოდა.

გეგმები მქონდა - სუპერმარკეტი, ბენზინგასამართი სადგური და სხვადასხვა ქვემოიჯარეები უნდა მყოლოდა. ეს რომ გაიგეს და დათვალეს, რომ 20 – 30 ათასამდე გამოდიოდა, თქვეს, რომ ჩვენ რატომ უნდა დავკარგოთ, მოვიდნენ და ჩვენთან დადონ ხელშეკრულება პირდაპირო. ამიტომ ქვემოიჯარეობის უფლებას აღარ მაძლევდნენ. ასეთ შემთხვევაში მეტყოდნენ, რომ წავსულიყავი, გარანტია მოვითხოვე და ჩემი სიტყვაა გარანტიაო. ამაზე რა თქმა უნდა არ დავთანხმდი. პირდაპირ მითხრეს, რომ ტუალეტის ფული მამაჩემის არისო, კონტეინერის - ჩემი ძმისო. ყველაფერს აკეთებდნენ, რომ მე თვითონ წავსულიყავი.

- მერე რა მოხდა?

ივლისში შეწყვეტის წერილი გამომიგზავნა, მე ვუთხარი, სანამ არ გაირკვევა, თანხას არ ჩავრიცხავ-თქო. მე ივნისში, წინსწრებით ჩავრიცხე ივლისის ფული. აგვისტო არ გადავიხადე მხოლოდ და სექტემბერი ისედაც არ მეკუთვნოდა. საინტერესოა, რატომ დათვალა სამი თვე მოსამართლემ, როდესაც მე სექტემბერში არ მიმუშავია.

- შეწყვეტის წერილი რის საფუძველზე გამოგიგზავნათ, მიზეზი რა იყო მითითებული?

თავიდან 8 ათასზე შევთანხმდით, მაგრამ სანამ საჯარო რეესტრში მივედით 10 ათასი მოითხოვა. შესაბამისად, ორი ხელშეკრულება გვაქვს რვა და ათი ათასზე. ბოლოს 12 ათასიც მოითხოვეს, მაგრამ მაგაზე უკვე უარი ვუთხარი. შეწყვეტის მიზეზად სწორედ ეს ფაქტი მოიყვანა - შენ დროზე არ რიცხავ თანხას, ჩვენ საგადასახადოში 15 რიცხვამდე უნდა შევიტანოთ და შენ 15-ის მერე რიცხავო. ეს მიზეზი იყო. მეორე სართული დაკავებული ჰქონდათ მთლიანად, კლიტეც და გასაღებიც თვითონ ჰქონდათ, დაბლა მოუწესრიგებელი ოთახი ჰქონდათ, რომლის რემონტიც მე გავაკეთე, ეგეც მაგათი იყო და თვითონ არაფერს იხდიდნენ.

რაც შეეხება ჩარიცხვებს და ქვითრებს, ყველა მაქვს. მე საბუთებით დავამტკიცებ ჩემ სიმართლეს. მეწილეები 7 ათასს კითხულობდნენ, სად გაქრა ეს თანხაო, ნატალია ჩიხლაძე კი ახალციხეში არ ჩამოდიოდა. ახლა გასაგებია, რომ ეს სკანდალი ამისთვის სჭირდებოდა, ვითომ სანამ თვითონ არ იყო ადგილზე არტაშ პეტროსიანი ქონებას ართმევდა. ოჯახის წევრებს ორმაგ ანაზღაურებას უხდიდა და დანარჩენ მეწილეებს - ზოგი მოლარედ მუშაობს და ზოგი სხვადასხვა პოზიციაზე, მათ ცოტას აძლევდა. იმ მოლარეს, რომელიც ჩემთან მუშაობდა საერთოდ არ მისცა იმ 7 ათასიდან, შენ მაგასთან მუშაობო უთხრა.

- ხელშეკრულების საფუძველზე თქვენ რა გადმოგცათ შპს მგზავრმა?

ჩვენ იჯარით ავიღეთ მთლიანად მიწა და ქონება. მათ იცრუეს, როცა თქვეს, რომ თავიდან ნახევარს ვიხდიდი და მარტიდან საერთოდ აღარ ჩავრიცხე. ყველაფერი ჩარიცხულია და მე ამის დოკუმენტაცია მაქვს. სასამართლოში მეორედ შეიტანეს საჩივარი, პირველად 22 ათასს ითხოვდნენ, მეორედ 32 ათასს. სექტემბერს ამატებენ და რატომ უნდა გადამეხადა წინასწარ ტყუილად. მოსამართლემ მკითხა, რით დაამტკიცებ, რომ სექტემბერში არ გიმუშავიაო? პოლიცია, ჟურნალისტები - ყველა იქ იყო და მეტი რაღა დამტკიცება უნდა? მიუხედავად ამისა, მოსამართლემ არაფერი გაითვალისწინა და თქვა, რომ სამი თვე გამოვიდა და როგორ გამოვიდა სამი თვე?
- რას აპირებთ?

აუცილებლად გავასაჩივრებ, ჯერ მარტო იმიტომ, რომ სამი თვე დათვალეს, მაშინ როცა სამი თვე არ არის. ივლისიდან მთელი ფული მაგათ აიღეს, მაშინ როცა მე მეკუთვნოდა ხელშეკრულებით, გატეხეს და დაიწყეს მუშაობა. ახლა რომ ამბობს, პროკურატურამ უნდა დამიჭიროსო, რატომ აკეთებ ეგეთ საქმეს? თვითონ იცის რომ კანონს არღვევს და მაინც აკეთებს. ჩემი ბრუნვა იანვრიდან რომ დავთვალოთ მარტო 8 თვეში სალაროდან იყო 423 ათასი. როგორ ხდებოდა, რომ მაგათ მთელი წლის განმავლობაში 30 – 35 – 40 ათასი ჰქონდათ მხოლოდ?

მაგალითად, ავიღოთ თბილისი - ახალციხის მარშუტი, რომელიც 15 ლარი ღირს. როგორ ხდება, რომ დღის ბოლოს 60 ლარია მარტო? სულ ჯიბეში მიდიოდა და ამიტომ არ აწყობდა იჯარა. ოთხ მეწილეს ფულს არ აძლევდა, კი ვეუბნებოდი რომ ადრე თუ გვიან პრობლემები გექნებათ-თქო. მანველიშვილზე ამბობდა, ჩუმად იყიდა და არ ეკუთვნისო, სარქისიანია კიდევ და ეგ რუსეთში ცხოვრობს და არ ეკუთვნისო, ნახაპეტიანია კიდევ და არ ეკუთვნისო და მორჩა. დაიწყებდა ლანძღა-გინებას და ისინიც ჩუმდებოდნენ.

- თქვენ პროკურატურაშიც დაწერეთ საჩივარი და სასამართლოშიც შეიტანეთ სარჩელი?

უკანონოდ შევიდნენ, ხელის შეშლა იყო ყველანაირად მას შემდეგ, როგორც კი საქმე აეწყო და ეს დაფიქსირებულია, ვისაც იჯარით მივეცით, ეუბნებოდნენ, რომ ფული არ მისცეთო. რა თქმა უნდა, ბოლომდე ვიბრძოლებ ჩემი სიმართლის დასადგენად.

შპს „მგზავრის“ დირექტორის ნატალია ჩიხლაძის განცხადებით, 28 თებერვლის გადაწყვეტილება მისთვის უმნიშვნელოვანესი იყო, რადგან როგორც ჩიხლაძემ აღნიშნა, ის პროკურატურაშიც დაიბარეს და უთხრეს, რომ მის მიმართ სისხლის სამართლის საქმის წარმოების დაწყებას აპირებდნენ.

თეგები: სასამართლო დავა / შპს ვიპ ტრანს / შპს მგზავრი /

Հեղինակ:

მეცხრე არხი