Շրջակա միջավայրի ազգային գործակալության տվյալներով, առաջիկա օրերին Վրաստանում ջերմաստիճանի զգալի աճ կդիտվի:

Օդերևութաբանների կանխատեսումների համաձայն, օգոստոսի 6-7-ը Վրաստանի արևմուտքում օդի ջերմաստիճանը կարող է գերազանցել 40 աստիճանը, իսկ օգոստոսի 7-9-ը` արեւելյան Վրաստանում՝ 39 աստիճանը:

Օգոստոսի 6-7-ը Սև ծովի ափամերձ տարածքներում, Վերին Իմերեթիում, Կոլխեթիի ցածրադիր գոտիներում և Գորի-Սուրամի հատվածում արևելքից ուժգին քամի կփչի:

Շրջակա միջավայրի ազգային գործակալությունը նշում է, որ օդի բարձր ջերմաստիճանը և ուժեղ քամին կնպաստեն անտառային հրդեհներին:

Տեղեկացնենք, որ մեկ շաբաթվա ընթացքում ամբողջ Վրաստանում սպասվում է ջերմաստիճանի կտրուկ բարձրացում, ինչը մեծացնում է անտառային և դաշտային հրդեհների վտանգը, – ասված է ներքին գործերի նախարարության արտակարգ իրավիճակների կառավարման ծառայության հայտարարության մեջ: «Արտակարգ իրավիճակների կառավարման ծառայությունը կոչ է անում ցուցաբերել բարձր քաղաքացիական պատասխանատվություն, կրակ չվառել գյուղատնտեսական նշանակության հողերում, անտառի կամ դաշտի մերձակայքում և հրդեհները չմատնել անուշադրության: Հիշեք, որ կենցաղային աղբը կարող է ինքնահրդեհվել, այսպիսով՝ չաղտոտեք շրջակա միջավայրը: Ծխացման կամ հրդեհի դեպքում անհապաղ տեղեկացրեք ՆԳՆ Հանրային անվտանգության կառավարման 112 կենտրոնին», – հայտնել են նախարարությունից: