გაუქმდება თუ არა საარჩევნო კანონმდებლობით გათვალისწინებული მაჟორიტარული სისტემა? – კონსტიტუციაში შესატან ცვლილებებზე დღეს ახალციხეში იმსჯელეს. რეგიონის შვიდივე მუნიციპალიტეტის ხელმძღვანელი პირები იმ ინიციატივას გაეცვნენ, რომლის მიხედვითაც 2016 წლის შემდგომ პერიოდში არჩევნები მხოლოდ პროპორციული წესით უნდა ჩატარდეს.
2016 წლის შემდგომ პერიოდში საქართველოში არჩევნები მხოლოდ პროპორციული სისტემის მიხედვით ჩატარდება–ეს ის ცვლილებაა, რომლის მისაღებადაც, აუცილებელია, პარლამენტის 113 წევრმა თანხმობა გამოთქვას. საარჩევნო სისტემაში შესატანი ცვლილების შესახებ ახალციხეშიც იმსჯელეს.
პარლამენტში შექმნილი საყოველთაო –სახალხო განხილვის კომისიის წევრები, ინიციატივის დადებით და უარყოფით მხარეებზე რეგიონის შვიდივე მუნიციპალიტეტის პირველ პირებს ესაუბრნენ.
საარჩევნო სისტემის ცვლილებასთან დაკავშირებით, განსხვავებული მოსაზრებები გამოთქვეს თვითმმართველობების წევრებმა. მათი ნაწილი მიიჩნევს, რომ ამჟამად არსებული სისტემა, რომელიც პროპორციულ და მაჟორიტარულ წესებს მოიცავს, მისაღებია, რადგან ისეთ მცირე მუნიციპალიტეტებს, რომლებიც სამცხე–ჯავხეთშია აუცილებელია პარლამენტში თავიანთი წარმომადგნლები ჰყავდეთ.
პარლამენტში შექნილ საორგანიზაციო კომისიაში, რომელიც საარჩევნო კანონმდებლობის ცვლილებებს განიხილავს, არასამთავრობო ორგანიზაციის წევრებიც შედიან. განვითარებისა და დემოკრატიის ცენტრის თავმჯდომარე, ქეთევან ჩაჩვა აღნიშნავს, რომ მსგავსი შეხვედრების მიზანია, ინიციატივის შესახებ მოსახლეობის აზრი მოისმინონ.
ინიციატივა, მაჟორიტარული სისტემის, პროპორციული მრავალმანდატიანი ოლქების სისტემით შეცვლასთან დაკავშირებით, პარლამენტში უმრავლესობის 80–მა დეპუტატმა წარადგინა. იმისთვის რომ ცვლილება მიიღონ, 150 წევრიან პარლამენტში სიახლეს მხარი 113–მა მათგანმა უნდა დაუჭიროს. თუმცა უმცირესობის წევრები ინიციატივას არ ეთანხმებიან.
