,,ქართული ოცნებისა” და ,,ერთიანი ნაციონალური მოძრაობის” კანდიდატებმა, საპარლამენტო არჩევნების პირველ და მეორე ტურში, განსხვავებული შედეგები მიიღეს.

ვაჟა ჩიტაშვილს პირველ ტურში ამომრჩეველთა 44.07%–იანი მხარდაჭერა ჰქონდა, მეორე ტურში კი 30.18%. გიორგი კოპაძემ პირველ ტურში 39.65% მიიღო, მეორეში კი მხარდამჭერთა რაოდენობა 69.83%–მდე გაიზარდა. რატომ შეცვალა ამომრჩეველმა სამ კვირაში პოლიტიკური სიმპათიები – სამოქალაქო სექტორის წარმომადგენლებსა და ადგილობრივებს განსხვავებული მოსაზრებები აქვთ.

ყველა ოლქში გამარჯვება, მმართველი ძალისთვის პრესტიჟის საკითხი იყო – ამბობენ არასამთავრობო ორგანიზაცია ,,დემოკრატ მესხთა კავშირში.” გია ანდღულაძე ვარაუდობს, რომ ამის გამო, პირველი ტურის შემდეგ, ,,ქართული ოცნების” წინასაარჩევნო კამპანია უფრო გააქტიურდა.

პირველ და მეორე ტურში, მნიშვნელოვნად განსხვავებულ შედეგებს, დანარჩენ ოლქებში მმართველი ძალის გამარჯვებას უკავშირებს ასოციაცია ,,ტოლერანტის” ხელმძღვანელი. ცირა მესხიშვილი ვარაუდობს, რომ ამომრჩეველმა ოპოზიციონერ კანდიდატს, მმართველი ძალის მიერ მხარდაჭერილი მერი და მაჟორიტარი არჩია.

უჩა ბლუაშვილი, ,,ქართული ოცნების” კანდიდატის მხარდაჭერის ზრდას იმით ხსნის, რომ მეორე ტურში, სადამკვირვებლო მისიების სიმცირის გამო, მმართველ ძალას გაყალბების საშუალება მიეცა. პოლიტოლოგი პირველსა და მეორე ტურს შორის განხორციელებულ ზეწოლაზეც საუბრობს.

რატომ შეცვალა სამ კვირაში პოლიტიკური სიმპათიები ამომრჩეველმა – გამარჯვებული კანდიდატები არ აკონკრეტებენ, თუმცა ამბობენ, რომ მმართველმა ძალამ პირველ ტურში დაშვებული შეცდომები, მეორეში გამოასწორა.