საქართველოს საარჩევნო კანონმდებლობაში შესაძლოა ცვლილება შევიდეს – მაჟორიტარული სისტემის გაუქმების შესახებ, როგორც პარლამენტში, ასევე მმართველ და ოპოზიციურ პარტიებში განსხვავებული მოსაზრებებია. პროპორციული სისტემის უპირატესობის შესახებ საუბრობენ ახალციხიეში მოქმედი პოლიტიკური პარტიების წევრები. თავად მაჟრიტარი დეპუტატი კი, რომელიც ახალციხის მუნიციპალიტეტს პარლამენტში წარადგენს, მიიჩნევს, რომ არსებული შერეული სისტემა უნდა გაუქმდეს, თუმცა კანონპროექტში რეგიონის ინტერესები უნდა გაითვალისწინონ.
ვაჟა ჩიტაშვილი, საქართველოს პარლამენტში, ახალციხის მუნიციპალიტეტის წარმომადგენელია. მაჟორიტარი დეპუტატის მანდატი, მან 2012 წლის საპარლამენტო არჩევნებში, ამომრჩეველთა 80%–იანი მხარდაჭერით მოიპოვა. ,,ერთიანი ნაციონალური მოძრაობის“ დეპუტატი ამბობს, რომ მაჟორიტარული სისტემის გაუქმებას წინა ხელისუფლებაც გეგმავდა, შესაბამისად, ამ ეტაპზე, ისინი ინიციატივას მხარს დაუჭერენ. საარჩევნო სისტემის ცვლილებას, ჩიტაშვილი რამდენიმე მიზეზით ხსნის. მისი თქმით, ერთის მხრივ, სისტემა არათანაბარ პირობებში აყენებს ამომრჩველთა რაოდენობის მიხედვით მცირე და მრავალმაცხოვრებლიან დასახლებებს, რადგან ორივე მათგანიდან პარლამენტში მხოლოდ ერთი დეპუტატია წარმოდგენილი. პარლამენტის წევრი იმაზეც საუბრობს, რომ მაჟორიტარ დეპუტატებს ამომრჩევლებთან სიშორის გამო, ნაკლები კონტაქტი აქვთ.
საარჩევნო კოდექსში ცვლილებების შეტანისა და მაჟორიტარული სისტემის გაუქმებისაკენ, არასაპარლამენტო ოპოზიციამ, რომელიც 15 პოლიტიკური პარტიის გაერთიანებას წარმოადგენს, ხელისუფლებას არაერთხელ მიმართა. აღნიშნული გაერთიანების წევრია ,,საქართველოს ძალოვან–ვეტერანთა და პატრიოტთა პოლიტიკური მოძრაობაც”. რეგიონული ორგანიზაციის თავმჯდომარე ,,მე–9 არხთან“ განმარტავს, რომ სისტემის გაუქმება დროული და აუცილებელია.
გოჩა ათოშვილს ეთანხმებიან ,,თავისუფალი დემოკრატებისა“ და ,,გაერთიანებული დემოკრატიული მოძრაობის” სამცხე–ჯავახეთის ორგანიზაციის ხელმძღვანელებიც. ოპოზიციური პატრიების წარმოამდგენლები არგუმენტად, კვლავ არჩეული მაჟორიტარი დეპუტატების არაეფექტურ მუშაობას ასახელებენ და განმარტავენ, რომ მათი უმრავლესობა მუნიციპალიტეტებში არსებულ პრობლემებსა და მოსახლეობის მდგომარეობაზე ყურადღებას არ ამახვილებს.
საარჩევნო კანონმდებლობაში მოსალოდნელ ცვლილებებთან დაკავშირებით, ,,ქართული ოცნების“ წევრსა და ახალციხის მერიის ზედამხედველობის სამსახურის უფროსს, საკუთარი მოსაზრება აქვს. ნაირა სამსონიძე ამბობს, რომ ქვეყნის პარლამენტი ორპალატიანი უნდა გახდეს, რაც კონსტიტუციაშია გათვალისწინებული და მასზე მუშაობა აუცილებელია.
მაჟორიტარული სისტემის გაუქმების დადებით და უარყოფით მხარეებზე საუბრობს არასამათავრობო ორგანიზაცია ,,დემოკრატ მესხთა კავშირის“ ხელმძღვანელი. გია ანდღულაძე ამბობს, რომ სისტემის გაუქმების წინააღმდეგი არ არის, თუმცა მიიჩნევს, რომ ცვლილება რეგიონებზე უარყოფით გავლენას მოახდენს. სამოქალაქო სექტორის წარმომადგენლის თქმით, ამომრჩეველმა ხმა კონკრეტულ დეპუტატს უნდა მისცეს, რომელსაც იცნობს და ენდობა. პარტიული სიით არჩეული კანდიდატი კი მისი აზრით, შესაძლოა, რეგიონის მდგომარეობას არ იცნობდეს.
მაჟრიტარული სისტემის გაუქმებისა და პარლამენტის მხოლოდ პროპორციული სიებით დაკომპლექტების მოთხოვნით, არასაპარლამენტო ოპოზიციამ მთავრობას რამდენჯერმე მიმართა. აღნიშნულ მოთხოვნას ეთანხმება პარლამენტის იურიდიულ საკითხთა კომიტეტის თავმჯდომარეც, თუმცა ცვლილების შესახებ, როგორც მმართველ, ასევე ოპოზიციურ ძალებში, განსხვავებული მოსაზრებებია. ამჟამად კი ქვეყანაში შერეული სისტემა მოქმედებს. 150–წევრიან პარლამენტში, 73 დეპუტატი მაჟორიტარულ, ერთმანდატიან ოლქში ირჩევა, ხოლო დანარჩენი 77 ადგილი, პროპორციული სისტემით, იმ პოლიტიკურ პარტიებს შორის ნაწილდება, რომლებიც 5%–იან ბარიერს გადალახავენ.
