შეუსრულებელი წინასაარჩევნო დაპირება თუ პასუხისმგებლობა, რომელიც რამდენიმე უწყებაზე ნაწილდება– საბარგო სადგურის მოსახლეობა კვლავ დაპირებების იმედად ცხოვრობს. საკანალიზაციო სისტემისა და სანიაღვრე არხების არ არსებობა მათ არაერთ პრობლემას უქმნის.
საბარგო სადგურის დასახლებში ფეკალური მასა თითქმის ყველა ქუჩაზე მოედინება. აქ საკანალიზაციო სისტემა და სანიაღვრე არხები არ არსებობს. ტალახის გამო შეზღუდულ მოძრაობას თან ანტისანიტარია და გაუსაძლისი სუნი ახლავს. ღია არხების გამო, დაბინძურებული წყალი შენობებს ტბორავს. მაცხოვრებლები ამბობენ, რომ მდგომარეობა კრიტიკულია და ადგილობრივმა ხელისუფლებამ პრობლემების მოგვარება დროულად უნდა დაიწყოს.
საკანალიზაციო სისტემის მოწესრიგების მიზნით, დასახლების მაცხოვრებელებმა ახალციხის მერიას მიაკითხეს. მათი თქმით, ისევე, როგორც წინა წლებში, ადგილობრივი თვითმმართველობა მათ ამჯერადაც დახმარებას დაპირდა.
საკანალიზაციო სისტემის მოგვარება ქალაქის ამჟამინდელი მერის წინასაარჩევნო დაპირებას წარმოადგენდა. საბარგო სადგურის მაცხოვრებლები იხსენებნ, რომ არჩევნების წინ, ისევე როგორც სხვა პარტიის წარმომადგენლები მათთან გიორგი კოპაძე მივიდა და პრობლემების მოგვარებას დაპირდა. ტელეკომპანია ,,მე–9 არხთან“ ქალაქის მერი აცხადებს, რომ საბარგო სადგურზე არსებული მდგომარეობა მისთვის ნაცნობია, თუმცა 2015 წლის, ადგილობრივი ბიუჯეტიდან საკანალიზაციო სისტემის მოწესრიგებისათვის თანხის გამოყოფა შეუძლებელია. გიორგი კოპაძის თქმით, აღნიშნული საკითხი არა მერიის, არამედ გაერთიანებული წყალმომარაგების კომპანიის კომპეტენციაში შედის.
საწინააღმდეგოს ამბობენ გაერთიანებული წყალმომარაგების კომპანიის ცენტრალურ ოფისში. საზოგადოებასთან ურთიერთობის სამსახურში ,,მე–9 არხს“ განუმარტეს, რომ ისინი სამუშაოებს იმ ადგილზე ასრულებენ, რომელზეც დავალებას ადგილობრივი თვითმმართველობა მისცემს. სამსახურის უფროსი, ნინო რამიშვილი განმარტავს, რომ საბარგო სადგურის შესახებ მათთან ინფორმაცია ახლახანს შევიდა და შესაბამისი ზომები მიიღეს. დასახლებაში პრობლემა კი თითქმის 5 წელია არსებობს.
ეს კადრები კი ტელეკომპანია ,,მე–9 არხმა“ გასული წლის მაისის თვეში გადაიღო. საბარგო სადგურის მაცხოვრებლები იმ პერიოდშიც ადგილობრივი ხელისუფლებისგან საკანალიზაციო სისტემის მოწესრიგებას მოითხოვდნენ. პირველი პირებისგან დაპირება მაშინაც იყო, თუმცა პრობლემა კვლავ მოუგვარებელია. არ არსებული საკანალიზაციო სისტემა, დაახლოებით, 350 ოჯახს ყოველდღიურად ისევ არაერთ პრობლემას უქმნის. დაიწყებს თუ არა გაერთიანებული წყალმომარაგების კომპანიის საპროექტო დეპატრამენტის ბრიგადა 22 დეკემბრიდან ახალციხეში მუშაობას? – მოვლენების განვითარებას ,,მე–9 არხი“ დააკვირდება.
