14 დეკემბერს, დილიდან, სამცხე–ჯავახეთს, ბუნებრივი აირის მიწოდება შეუწყდა. გაზის გარეშე, ახალციხისა და ასპინძის 7 500–მდე აბონენტი და ახალქალაქის მოსახლეობა დარჩა. მაცხოვრებლების უკმაყოფილება იმან განაპირობა, რომ ზოგიერთი ადგილობრივი გათბობის საშუალების გარეშე, ორი დღის განმავლობაში რჩებოდა. აღნიშნული მიზეზის გამო, სასწავლო პროცესი ჩაიშალა საბავშვო ბაღებში, საჯარო სკოლებში კი გაკვეთილების ხანგრძლივობა შეიცვალა.
დღეს, ახალციხის რვავე საბავშვო ბაღში მისული აღსაზრდელები, სახლებში გაუშვეს. სასწავლო პროცესის ჩაშლის მიზეზი – ბუნებრივი აირის მიწოდების შეწყვეტა იყო. ახალციხის სკოლამდელი აღზრდის დაწესებულებებიდან, ოთხი მათგანი გაზით, ოთხი კი შეშის ღუმელით თბება. სასწავლო პროცესი, ახალციხის ბაგა–ბაღებში, ხვალიდან განახლდება.
ბუნებრივი აირის შეწყვეტის გამო, სასწავლო პროცესში ცვლილებების შეტანა მოუწია, ახალციხის იმ ოთხ სკოლას, რომელშიც გაზით თბებიან. მეორე, მეოთხე, მეექვსე და მეშვიდე საჯარო სკოლაში გაკვეთილების ხანგრძლივობა 45–დან 35 წუთამდე შეამცირეს. მეექვსე სკოლის საკლასო ოთახებს დღეს, ელექტროგამათბობელებით ათბობდნენ.
“საქართველოს გაზის ტანსპორტირების კომპანიის“ ინფორმაციამ, რომ ბუნებრივი აირი ორი დღის განმავლობაში გაითიშებოდა, მოსახლეობის უკმაყოფილება გამოიწვია. აბონენტების დიდი ნაწილი გაზის გამათბობლებით თბება, რის გამოც, ზამთრის ცივ დღეებში, ისინი გათბობის ერთადერთი საშუალების გარეშე რჩებოდნენ.
“საქართველოს გაზის ტანსპორტირების კომპანიის“ ინფორმაციით, გაზმომარაგების დროებითი შეწყვეტის მიზეზი, მარნეულის განშტოებაზე ჩასატარებელი სამუშაოები იყო. მათი ინფორმაციის მიუხედავად, სამცხე–ჯავახეთში გაზმომარაგება დღესვე აღდგა. “მეცხრე არხს” “ინტერგაზის” ხელმძღვანელმა ვასილ აბულაძემ განუცხადა, რომ მარნეულში სამუშაოები ვადაზე ადრე დაასრულეს და შესაბამისად, ბუნებრივი აირის მიწოდება დღეს, 14 დეკემბერს აღდგა.
