ახალციხის მერია ბაგა ბაღის მშენებლობას გეგმავს, სადაც სკოლამდელი აღზრდის სამი დაწესებულება გაერთიანდება – ეს განცხადება ქალაქის მერმა არასამთავრობო ორგანიზაციების წარმომადგენლებთან შეხვედრისას გააკეთა.
ახალციხის მერმა გიორგი კოპაძემ არასამთავრობო ორგანიზაციებთან შეხვედრისას განმარტა, რომ ნომერ მეოთხე, ეგრეთწოდებული ჯაყელების ბაგა–ბაღის დანგრევა და მის ადგილზე ახალი, თანამედოვე სტადარტების შესაბამისი სკოლამდელი აღზრდის დაწესებულების აშენება იგეგმება. აღნიშნულ შენობაში კი ნომერ პირველი ბაგა და ნომერ პირველი ბაღი გადავა.
ნომერ მეოთხე ბაგა–ბაღი, რომელიც მარდის დასახლებაში მდებარეობს გასულ საუკუნეშია აშენებული და ორი კორპუსისაგან შედგება, თუმცა ერთი–ერთი ავარიულია ამიტომ ბაღი მხოლოდ ერთ მათგანში ფუნქციონირებს. სკოლამდელი აღზრდის დაწესებულებაში სამი ჯგუფია. დაწესებულების მენეჯერი ამბობს, რომ პირობების არარსებობისა და სივიწროვის გამო ჯგუფების დამატება ვერ ხერხდება. მარინა თოთაძის მტკიცებით შენობა ძველია და სტანდარტებს არ აკმაყოფილებს, ამიტომ იგი ქალაქის მერის მოსაზრებას ეთანხმება.
მეოთხე ბაგა–ბაღის მსგავსად ნომერ პირველ ბაგაშიც პირობების არარსებობაზე ჩივიან. მენეჯერის მტკიცებით ფართი მცირეა და არც ეზოა კეთილმოწყობილი. ამიტომ შენობის რეაბილიტაციას აზრი არ აქვს და უმჯობეის იქნება თუ დაწესებულება სხვა შენობაში გადავა.
როდის დაიწყება ქალაქში ახალი ბაღის მშენებლობა ჯერჯერობით უნცონია. ქალაქის მერიაში განმარტავენ, რომ ამ დროისათვის თანხების მოძიება მიმდინარეობს. არც ის არის ცნობილი, როგორ გადანაწილდება შტატების რაოდენობა, თუმცა ბაღების მენეჯერები თანხმდება, რომ სკოლამდელი აღზრდის ახალი დაწესებულება ქალაქს აუცილებლად სჭირდება.
