ქართული სამღვდელოებისთვის დავით გარეჯის სამონასტრო კომპლექსის ეკლესიები გაიხსნება - პრემიერ-მინისტრი
საქართველოს პრემიერმა გიორგი გახარიამ მთავრობის სხდომის დაწყებამდე ბაქოში გუშინდელი ვიზიტი შეაჯამა.
გახარიას თქმით, საქართველოსა და აზერბაიჯანს შორის არსებობს საზღვრის მონაკვეთები, რომლებიც სამწუხაროდ, არაა დადგენილი. პრემიერის განმარტებით, სწორედ ამ თემას შეეხო ილჰამ ალიევთან შეხვედრისას და გადაწყდა, რომ ხვალიდან ქართული სამღვდელოებისთვის დავით გარეჯის სამონასტრო კომპლექსის ფარგლებში არსებული ეკლესიები გაიხსნება.
"გვერდს ვერ ავუვლიდით ისეთ მნიშვნელოვან თემას,როგორიც არის დავით გარეჯის სამონასტრო კომპლექსი, სამწუხაროდ, საქართველოსა და აზერბაიჯანს შორის არის საზღვრის გარკვეული მონაკვეთები, რომლებიც არაა დადგენილი. ეს არის ჩვენი პოსტსაბჭოთა მემკვიდრეობა და 25 წელია პრობლემა ვერ მოგვარდა. ბატონმა პრეზიდენტმა ალიევმა ბრძანა, რომ ჩვენ გვაქვს ისტორია და გეოგრაფია, რომელიც გვაკავშირებს და სრულად შემიძლია დავეთანხმო, რადგან პარტნიორებს და მეგობრებს ისტორია და გეოგრაფია კი არ ჰყოფს, არამედ აკავშირებს. ამ საფუძველზე, გვქონდა ღია საუბარი მიმდინარე პრობლემებზე და როგორც შედეგი შემიძლია გითხართ, რომ ხვალიდან ქართული სამღვდელოებისთვის კომპლექსის ფარგლებში არსებული ეკლესიები გაიხსნება და ჩვენ ნაბიჯ-ნაბიჯ ეტაპობრივად ამ მიმართულებითაც უნდა გვქოდნეს სერიოზული პროგრესი. ეს პრობლემა ორი ქვეყნის ნციონალური ინტერესების, ისტორიული მემკვიდრეობის და ეკლესიის ინეტრესების გათვალისწინებით უნდა გადაწყდეს",-განაცხადა გიორგი გახარიამ.
პრემიერმა მოქალაქეებს მოუწოდა, აღნიშნულ თემასთან დაკავშირებით, სიფრთხილე გამოიჩინონ.