,,გაერთიანებული დემოკრატიული მოძრაობის“ ადიგენის საკრებულოს წევრები, იურიდიულ საკითხთა კომისიას ბრალს უკანონო ქმედებაში სდებენ. დეპუტატები პრეტენზიას გამოთქვამენ იმის შესახებ, რომ კომისიამ მათ ფრაქციის ჩამოყალიბებაზე უარი განუცხადა. მიზანმიმართული ხელის შეშლა თუ კანონის ფარგლებში მოქცეული ქმედება, ბურჯანაძის პარტიის წევრთა ბრალდება და პასუხი კომისიის თავმჯდომარისგან.
მალხაზ ბოჩიკაშვილი ადიგენის საკრებულოში ,,გაერთიანებულ დემოკრატიულ მოძრაობას“ წარმოადგენს. აღნიშული პარტიიდან ადგილობრივი თვითმმართველობის შემადგენლობაში კიდევ ერთი წევრი მარლენ ქაფიანიძეა.იმისთვის, რომ ფრაქცია შეექმნათ, მათ კიდევ ერთი წევრი პარტია ,,მრეწველობა გადაარჩენს საქართველოდან“ რევაზ გოგნაძე დაიმატეს. წევრებმა დამფუძნებელი კრება 1 ივნისს ჩაატარეს და ფრაქცია სახელწოდებით ,,ნინო ბურჯანაძე–ერთიანი ოპოზიცია“ ჩამოაყალიბეს. თუმცა გოგნაძის ინიციატივით, შემდეგში მათ სახელწოდება შეცვალეს და ,,ადიგენის გარემოს დაცვის ფრაქცია“ დაარქვეს. საკუთარი გადაწყვეტილების ოფიციალური ნაწილისათვის მათ იურიდიულ საკითხთა კომისიაში აუცილებელი დოკუმენტაცია 4 ივნისს შეიტანეს. 11 ივნისს გამართულ კრებაზე კი წევრებს ფრაქციის ჩამოყალიბებაზე უარი ეთქვათ. ბოჩიკაშვილი მიიჩნევს, რომ კომისიის გადაწყვეტილება უკანონოა, ხოლო მიზეზი დაუსაბუთებელი.
ფრაქციის ჩამოყალიბებაზე უარის მიზეზად, იგივე კოდექსსა და მუხლს ასახელებს იურიდიულ საკითხთა კომისიის თავმჯდომარე მუხრან ხარშილაძე. მისი თქმით, წევრებს უარი თვითმმართველობის კოდექსის 30–ე მუხლისა და ადიგენის მუნიციპალიტეტის საკრებულოს რეგლამენტის 35–ე მუხლის საფუძველზე ეთქვათ, სადაც მითითებულია, რომ ფრაქციის წევრებს საერთო პოლიტიკური ინტერესები უნდა ჰქონდეთ. ხარშილაძე მიიჩნევს, რომ გადაწყვეტილება საკუთარი შეხედულებისამებრ გამოიტანა, ისე, როგორც კანონში მითითებული პუნქტები თავად ესმის.
11 ივნისს გამართულ იურიდიულ საკითხთა კომისიის სხდომაზე, ფრაქციის ჩამოყალიბების შესახებ უარი 6 წევრიდან 3–მა მათგანმა დააფიქსირა, ერთმა თავი შეიკავა ხოლო 2 დეპუტატი: ,,ნაციონალური მოძრაობის“ წევრი თემურ ფეიქრიშვილი და საკრებულოს ყოფილი თავმჯდომარე ლევან ლობჯანიძე სხდომაზე არ იმყოფებოდნენ. გადაწყვეტილების შესახებ, ფეიქრიშვილი მიიჩნევს, რომ კომისიის წევრთა ვალდებულებაა კანონმდებლობის შესაბამისად იხელმძღვანელოს და არა პირადი შეხედულებისამებრ.
ფრაქციის ჩამოყალიბებაზე უარს ,,გაერთიანებული დემოკრატიული მოძრაობის“ წევრები საკრებულოს მხრიდან მიზანმიმართულ ქმედებას უკავშირებენ. მალხაზ ბოჩიკაშვილის თქმით, მსგავს ფაქტს ადგილი ამ დრომდეც ჰქონდა. დეპუტატი ჰყვება, რომ რამდენიმე თვის წინ ფრაქციის ჩამოყალიბებას პარტიის ორი წევრი დამოუკიდებელ დეპუტატთან თემურ შავაძესთან ერთად გეგმავდა, თუმცა ეს უკანასკნელი სამცხე–ჯავახეთის გუბერნიაში დაიბარეს და ზეწოლის შედეგად გადაწყვეტილება შეაცვლევინეს. კითხვაზე : თუ ვინ იყვნენ ეს პიროვნებები, ბოჩიკაშვილის თქმით, ამას შავაძე ვერ ასახელებს, რადგან მათ არ იცნობდა. სამომავლოდ ,,გაერთიანებული დემოკრატიული მოძრაობის“ წევრები საკითხთან დაკავშირებით სასამართლოში ჩივილს აპირებენ.
