„გამგებლების თავები დაიყრება, მაქვს ინფორმაცია, რომ გამგებლების ნაწილი მამაძაღლობს, მაგრამ დასამტკიცებლად ფაქტები და კომპანიების დახმარება მჭირდება“–ეს განცხადება საქართველოს ინფრასტრუქტურისა და რეგიონული განვითარების მინისტრის მოადგილემ გააკეთა. აღნიშნულს  ბორჯომის მუნიციპალიტეტში გამოეხმაურნენ.

“როცა 12 სატენდერო დოკუმენტაციიდან რვა ტენდერში ერთი გამარჯვებული კომპანიის შესახებ მომდის ინფორმაცია, ტენდერის არსი უკვე დაკარგულია. ახალქალაქშიც ასე ხდება, ყველა ტენდერს­ “ჯავახ ავტოგზა” იგებს. ვერ ვიტყვი, რომ შავლიაშვილი წარმატებული მინისტრია”–ეს განცხადება საქართველოს ინფრასტრუქტურისა და რეგიონული განვითარების მინისტრის მოადგილემ გააკეთა. ნოდარ ჯავახიშვილმა განმარტა, რომ სახელმწიფოს მიერ გამოცხადებული ტენდერების საკმაოდ დიდ ნაწილში მხოლოდ ერთი კომპანია მონაწილეობს. იგი ბორჯომის მუნიციპალიტეტსაც შეეხო და განმარტა,  რომ ტენდერებთან დაკავშირებით საქმეს აუცილებლად შეისწავლის.

ბორჯომის მუნიციპალიტეტის გამგებლის ტენდენციურობასა და ნეპოტიზმზე  საუბრობს გამგეობის ყოფილი პრეს სამსახური. ნატა კოპაძის თქმით, თემში ყველა გამოცხადებულ ტენდერს დიმიტრი ყიფიანთან დაახლოებული პირები იგებენ და  კომპანია „მშენებელ“–ს ყოველთვის უპირატესობა ენიჭება. ნატა კოპაძის მსგავსად, ბორჯომის მუნიციპალიტეტის ყოფილი კულტურის სამსახურის უფროსი ამბობს, რომ გამგეობაში ყველა სტრუქტურაში გადაწყვეტილებები ნათესაური კავშირების სასარგებლოდ მიიღება.

გამგებლის ყოფილი პრესსამსახურის მსგავსად ლეიბორისტული პარტიის წარმომადგენელი ბორჯომის მუნიციპალიტეტის გამგეობის თანამშრომლების ტენდენციურობასა და ქრთამის აღებაზე საუბრობს.  გიორგი გიუაშვილის თქმით, სამცხე–ჯავახეთში მსგავსი მდგომარეობა მხოლოდ მხარის პირველი პირის ბრალია, რის გამოც გუბერნატორი დაკავებული თანამდებობიდან აუცილებლად უნდა გადადგეს.

 ოპონენტთა ბრალდებებს კატეგორიულად უარყოფს  ბორჯომის მუნიციპალიტეტის გამგებელი.  მისი თქმით, თემში ყველაფერი კანონის  დაცვით ხდება და ტენდერებს სხვადასხვა კომპანიები შეთავაზებული პროექტების მიხედვით იგებენ. დიმიტრი ყიფიანის აზრით, ადგილი აქვს ცილისწამებასა და გაუგებრობას.

ბორჯომის მუნიციპალიტეტის გამგებელთან ნათესაურ კავშირებს უარყოფს კომპანია „მშენებელი“–ს მთავარი ინჟინერი. გიორგი ოქანაშვილის  თქმით, მისმა კომპანიამ  მხოლოდ ერთ ტენდერში მიიღო მონაწილეობა, რომლის სამუშაოებიც  ამ დრომდე მიმდინარეობს და აპრილში დასრულდება. შ.პ. ს „მშენებელი“ ძალიან ბევრია და შესაძლოა ამ კუთხით გაუგებრობა მოხდა–განმარტავს კომპანიის მთავარი ინჟინერი.

ფინანსურ ანგარიშგებასთან დაკავშირებით ადგილობრივი თვითმმართველობის ორგანოებში საკმაოდ რთული მდგომარეობაა, – ამის შესახებ  გენერალური აუდიტორი ლაშა თორდიაც  საუბრობს. სახელმწიფო აუდიტის სამსახურის უფროსის განმარტებით, ზოგან, ძირითადად, ცენტრალური თვითმმართველობის ორგანოებში, ეს საკითხი შედარებით მოგვარებულია, მაგრამ სხვა მუნიციპალიტეტებში ტენდერებთან დაკავშირებით ძალიან ბევრი პრობლემაა. მისივე მტკიცებით ადგილობრივ თვითმმართველობებს 2015 წელს დაგეგმილი პროექტების განხორციელება ჯერაც არ დაუწყიათ, მიუხედავად იმისა, რომ რეგიონული პროექტების ფონდიდან უკვე 82 მილიონი ლარია გამოყოფილი. ცნობილია, რომ ტენდერებთან დაკავშირებული პრობლემების თაობაზე აუდიტის სამსახურმა არაერთი მასალა გადააგზავნა პროკურატურაში.