შეუსრულებელი ვალდებულება თუ პროექტების ჩავარდნის ობიექტური მიზეზები– 2014 წელს, როგორც ქალაქ ახალციხის, ასევე მუნიციპალიტეტის მასშტაბით, ინფრასტრუქტურის სამინისტროდან დაფინანსებული ვერცერთი პროექტი დასრულდა. მათთვის გამოყოფილი თანხა მიმდინარე წლის ბიუჯეტს დაემატა, შესაბამისად სამუშაოები ერთი წლის დაგვიანებით მიმდინარეობს. ადგილობრივ თვითმმართველობებში ამბობენ, რომ სამუშოები კლიმატური პირობების გამო შეფერხდა, თუმცა საწინააღმდეგო მოსაზრება აქვთ ოპოზიის წევრებს.
სოფელ ღრელის ცენტრალური გზის მოასფალტება; პამაჯი-წყალთბილის ცენტრალური გზის რეაბილიტაცია-მოასფალტება; ზარზმელის ქუჩის რეაბილიტაცია და საკანალიზაციო ქსელის მოწყობა; გვარამაძის ქუჩაზე გზისა და სანიაღვრე არხის, ასევე გადასასვლელი ხიდის რეაბილიტაცია – ეს ის პროექტებია, რომელთა შესასრულებლადაც 2014 წელს ინფრასტრუქტურის სამინისტრომ ახალციხეში 3 მილიონამდე ლარი გამოყო, თუმცა სამუშოები განსაზღვრულ ანუ 1 წლიან ვადაში ვერ შესრულდა, ამიტომ პროექტები გარდამავალი გახდა და სამუშაოები მიმდინარე წელს განახლდა. აღნიშნული 5 პროექტიდან 2 მათგანზე პასუხისმგებლობა ახალციხის მუნიციპალიტეტს ეკისრება. გამგებელი, ზაზა მელიქიძე განმარტავს, რომ პროექტები კლიმატური პირობების გამო ვერ დასრულდა და სამუშოები აპრილის თვიდან განახლდება.
იგივე მიზეზი და 3 დაუსურულებელი პროექტი დარჩა ქალაქ ახალციხის მერიაში. 173 ათასამდე გვარამაძის ქუჩის მოასფალტებისათვის, დაახლოებით 121 000 ამავე ქუჩაზე არსებული ხიდის, ხოლო 585 000–მდე ლარი ზარზმელის ქუჩის სარეაბილიტაციო სამუშაოებისათვის – სამინისტროდან გამოყოფილი აღნიშნული თანხების ნაწილი მერიას აუთვისებელი დარჩა. მერის მოადგილე, ზაზა გელაძე პრობლემების მიზეზად კლიმატურ პირობებსა და მიწისქვეშა კომუნიკაციებს ასახელებს. ამბობს, რომ ქუჩებზე სამუშოები მიმდინარე წელს განახლდა და მარტის თვეში პროექტებს შესრულებულს ჩაიბარებენ.
2014 წელს შეუსრულებელ პროექტებიდან სამცხე–ჯავახეთის გუბერნატორის მოადგილე ორ მათგანს ასახელებს. ავთანდილ კაჭკაჭაშვილის თქმით, გასულ წელს მუნიციპალიტეტის მასშტაბით, მხოლოდ ღრელის გზის კეთილმოწყობა, ხოლო ქალაქის მასშტაბით, გვარამაძის ქუჩის რეაბილიტაცია ვერ მოესწრო. რაც შეეხება წყალთბილის გზას, მისი თქმით, სამუშაოები დასრულებულია, ზარზმელის ქუჩის მოწესრიგებისათვის განსახორცილებელ სამუშოებს კი იგი გასული წლის პროექტად არ მიიჩნევს, რადგან მშენებელ კომპანიასთან ხელშეკრულება 2015 წელს გაფორმდა, მიუხედავად იმისა, რომ პროექტი სამინისტროდან გასულ წელს დაფინანსდა და ტენდერი იმავე წელს იყო გამოცხადებული.
იმ ფაქტს, რომ ახალციხის მასშტაბით პროექტების ჩავარდნის მიზეზად ადგილობრივ თვითმმართველობებში კლიმატური პირობები დასახელდა, გაერთიანებული დემოკრატიული მოძრაობის რეგიონული კოოორდინატორი, ჯიმშერ გოგოლაური არ იზიარებს. იგი ვარაუდიობს, რომ პროექტები ხელოვნურად გაჭიანურდა, რადგაც მშენებარე ფირმებსა და ადგილობრივ თვითმმართველობებს შორის კორუმპირებული გარიგება მიმდინარეობდა.
შეუსრულებელი სამუშოებისა და ჩავარდნილი პროექტების შესახებ საუბრობენ ,,ერთიანი ნაციონალური მოძრაობის“ ახალციხის ოფისშიც. პარტიის ხელმძღვანელი გელა დემეტრაძე, რომელსაც წინა წლებში ახალციხის მუნიციპალიტეტის გამგებლის თანამდებობა ეკავა, ამბობს, რომ 2012 წლიდან პროქტების უმრავლესობა შეუსრულებელი რჩება. მისი თქმით, ახალი ხელისუფლების მოსვლის შემდეგ არაფერი გაკეთებულა ახალციხის ციხის ტერიტორიაზე, პროექტები ჩავარდა წყლის და საკანალიზაციო სისტემების რეაბილიტაციისათვისაც. ამის მიზეზად, გელა დემეტრაძე თანამდებობის პირების მხრიდან უპასუხისმგებლობასა და საქმის მიმართ არასერიოზულ დამოკიდებულებას ასახელებს.
2014 წელს ინფრასტრუქტურის სამინისტრომ ახალციხის მუნიციპალიტეტისა და მერიის მასშტაბით, მხოლოდ აღნიშნული 5 პროექტი დააფინანსა. ყველა მათგანი იმავე წელს უნდა დასრულებულიყო, თუმცა გეგმა ვერ შესრულდა. იმ ფაქტს, რომ რეგიონებში პროექტები დაუმთავრებელი რჩება 5 მარტს პრემიერ–მინისტრიც გამოეხმაურა. მისი თქმით, განუხორციელებელი სამუშოების გამო პასუხისგება მერებს, გამგებლებსა და მხარის გუბერნატორებს მოუწევთ. ახალციხის ადგილობრივ თვითმმართველობაში მიიჩნევენ რომ პრემიერ–მინისტრის განცხადება ახალციხის არც მუნციპალიტეტსა და არც მერიას ეხება.
