ახალციხეში მერიის სათათბირო ორგანო, ახალგაზრდული საბჭო ჩამოყალიბდება- ამასთან დაკავშირებით, 12 თებერვალს, საინიციატივო ჯგუფის 10-მდე წევრი ახალციხის მერს შეხვდა. ახალგაზრდებმა ადგილობრივი თვითმმართველობის პირველ პირებს ქალაქის კეთილმოწყობისათვის შემუშავებული რამდენიმე იდეა შესთავაზეს. საინიციატივო ჯგუფმა მოსახლეობის გამოკითხვის მიხედვით, პირველ ეტაპზე ყურადღება ცენტრალური პარკის მოწესრიგებაზე შეაჩერა.
ჯგუფის წევრებმა მერს სპეციალურად მომზადებული პრეზენტაცია წარმოუდგინეს. მათი თქმით, ქალაქის კეთილმოწყობისათვის უკეთესი იქნება თუკი პარკს დასასვენებელი სკამები, ნაგვის ურნები და სასმელი წყლის წერტილები დაემატება. გარდა ამისა, მათ სკვერში მრავალწლიანი ნარგავების დარგვისა და ღია WIFI-ის არსებობის შესახებაც ისაუბრეს.
აღნიშნული შეხვედრა „სამოქალაქო განვითარების ინსტიტუტის“ პროექტის, სახელწოდებით, „მერის სათათბირო ორგანოს – ახალგაზრდული საბჭოს დაფუძნება“, ფარგლებში მოეწყო. მსგავსი სათათბირო ორგანოს შექმნა საქართველოს ხუთ ქალაქში იგეგმება. საინიციატივო ჯგუფისა და ახალციხის მერის მომდევნო შეხვედრაზე, რომელიც მარტის ბოლოს გაიმართება, ახალგაზრდები მერს ახალ პრეზენტაციას, უპატრონო ძაღლების პრობლემაზე წარმოუდგენენ.
