ამ წუთებში ახალციხის ავტოსადგურის მიმდებარე ტერიტორიაზე აქციას მართავს მართლმადიდებელი მოსახლეობა. აქციის მონაწილეებს სამცხე–ჯავახეთის სხვადასხვა მუნიციპალიტეტებიდანაც უერთდებიან. შეკრებილები აცხადებენ, რომ ისინი მინარეთის რეგიონში შემოტანას არ დაუშვებენ.

აქციის მონაწილეები  ამ წუთებში  საზოგადოებას მოუწოდებენ შეუერთდნენ აქციას და გამოხატონ თავიანთი პოზიცია რელიგიისა და ქვეყნის გადასარჩენად.  ,,ჩატარდეს რეფერენდუმი და ყველამ ინდივიდუალურად მიიღოს გადაწყვეტილება საკუთარი რწმენისა და სინდისის წინაშე, ეს არის ჩვენი მოთხოვნა,  თუ გადაივლიან ჩვენს გვამებზე მაშინ გაატარონ ის ლითონის კონსტრუქცია. ჩვენ არ შევეგუებით მინარეთის ჭელაში დაბრუნებას”–განაცხადა აქციაზე ერთერთმა ორგანიზატორმა გიორგი კოპაძემ.  მართმადიდებლები მთავრობას მოუწოდებენ, რომ დროულად მიიღოს ქმედითი ზომები, რათა სიტუაცია მწვავე კონფლიქტში არ გადაიზარდოს. შეგახსენებთ, რომ მართმადიდებლებმა პირველი აქცია გუშინ ადიგენში გამართეს, ხოლო ახალციხის სამმართველოს შენობასთან დღეს დილის 10 საათიდან შეიკრიბნენ. აქციას, ადიგენის, ახალციხისა და ასპინძის მოსახლეობა ესწრება. ისინი ამ წუთებში ახალციიხს ავტოსადგურის ტერიტორიისაკენ მიემართებიან.

მარიამობა აწყურის ტაძარში

ვრცელი ვიდეო მასალა უკომენტაროდ

26.08.2013წ.  სამმართველოსთან შეკრებილები მოსახლეობა   დაკავებულების გათავისუფლებას გვიან ღამემდე ითხოვდა. პოლიციამ 26 აგვისტოს მხოლოდ 12 მათგანი გაათავისუფლა. 9 პირზე კი საქმე ადმინისტრაციული და სისხლის სამართლის კუთხით აღიძრა.  ადიგენელ მუსლიმებს მხარდამჭერები მთელი ღამის განმავლობაში უერთდებოდნენ. ისინი ამბობდნენ, რომ სპეცრაზმმა მათზე ძალმომრეობა განახორციელა და სასტიკად სცემა. მათი თქმით ნაცემები არიან დაკავებული პირებიც, თუმცა სამმართველოდან გათავისუფლებულები  მედიასთან მომხდარს უარყოფდნენ.

მინარეთის დემონტაჟი და ხმაური ადიგენსა და ახალციხეში.  26 აგვისტოს სოფელ ჭელამდე მისასვლელი ცენტრალური გზა  და კიდევ ორი შემოვლითი გზა ,,ექოს“ გადამღებ ჯგუფს დაკეტილი დახვდა. სამართალდამცავები მედიასთან გზის გადაკეტვის მიზეზებზე არ საუბრობდნენ. ამბობდნენ, რომ აღნიშნულის შესახებ მათ ზემოდან უბრძანეს. ჭელასთან ერთად გადაადგილება შეუძლებელი იყო ადიგენის მუნიციპალიტეტის კიდევ 7 სოფელში,  მედიისა  და ავტომანქანების გარდა სოფლებში არ უშვებდნენ ქვეითად მოსიარულეებსაც. ჭელისკენ მიმავალი გზა სამართალდამცავებმა  მინარეთის დემონტაჟის გამო გადაკეტეს.

ამ წუთებში, ადიგენის მუნიციპალიტეტში მშვიდობიან აქციას მართავს მართმადიდებელი მრევლი. დაბის ცენტრში 300–მდე ადამიანია შეკრებილი. ისინი ჭელაში, მინარეთის ირგვლივ განვითარებულ მოვლენებს ეხმაურებიან და საკუთარი უფლებების დაცვას ითხოვენ.  აქციაზე ადიგენის იმ სოფლების მოსახლეობა იმყოფება, სადაც მაცხოვრებელთა უმრავლესობა აჭარიდან ეკომიგრანტი მუსლიმები არიან. ამბობენ რომ აღნიშნულ სოფლებში რელიგიურ უმცირესობას მართმადიდებლები წარმოადგენენ და მათი უფლებები ირღვევა. ,,ჩვენ ამ გამოსვლით, ჩვენი უფლებების დაცვას მოვითხოვთ, წლების მანძილზე კარგი და კეთილმეზობლური ურთიერთობა გვქონდა აჭარიდან ჩამოსახლებულ მუსლიმებთან, ზედა ზონაში თითქმის ყველა სოფელში დგას მათი სალოცავი. მივეცით საშუალება, რომ აეშენებინათ ეს სალოცავები, რადგან მორწმუნე ადამიანი ცუდს არ გააკეთებს, თუმცა მათ დინამიკები დააყენეს მეჩეთებზე, როგორია როცა ხატებთან ზიხარ შენთვის ჩუმად ლოცულობ და მოლის ხმა ისმის? რამოდენიმე წელია შეწუხებულები ვართ, უმცირესობაში ჩვენ ვართ.  მოვითხოვთ გონზე მოვიდნენ აჭარლები და პატივი გვცენ ჩვენც” –აცხადებს აქციის მონაწილე პაატა ბლიაძე.  მართმადიდებელი მოსახლეობის აქცია დაბის ცენტრში ამ წუთებშიც მიმდინარეობს, ადიგენში იმყოფება ,,ექოს” გადამღები ჯგუფიც, დეტალებს პერიოდულად მოგაწვდით. აქციაზე მობილიზებულია პოლიციაც.    

თეოლოგი და უფლებადამცველი ბექა მინდიაშვილი ჭელაში მომხდარ მოვლენებს ფეისბუქის საკუთარ გვერდზე ეხმაურება:            ,,როდის იქნება “ინციდენტი” ამოწურული? მაშინ, როდესაც მინარეთის მოჭრის უკანონო ბრძანების ავტორს პასუხისგებაში მისცემენ, პასუხისგებაში მისცემენ შსს-ს თანამშრომლებს, რომლებმაც სცემეს მუსლიმები, დაისმება შშს-სა და რეინტეგრაციის მინისტრების პოლიტიკური პასუხისმგებლობის საკითხი, გაირკვევა ამ ყველაფერში ადგილობრივი მუნიციპალიტეტების როლი, დატუქსავენ წულუკიანს სისულელეების ლაპარაკისთვის, აღადგენენ მინარეთს და ივანიშვილის თამადობით, ძალიან დიდ ბოდიშს მოუხდის მთელი მთავრობა საქართველოს მუსლიმებს და მთელ მოსახლეობას ამ ანტისახელმწიფოებრივი, ანტიკონსტიტუციური, ქვეყნის უსაფრთხოებისთვის საფრთხის გამომწვევი ოპერაციისთის. მარგველაშვილი არ არი პრობლემა, არსებულის არარსებობაა და ყოფნის უარყოფა”– წერს ბექა მინდიაშვილი.

ადიგენში მომხდარ მოვლენებზე  საქართველოს პრეზიდენტმა განცხადება  ბათუმში ვიზიტის დროს გააკეთა: „მე მინდა გამოვეხმაურო იმ უკანონობას, რომელიც ჩადენილი იქნა ქართველი მუსლიმების მიმართ და რომელმაც აღაშფოთა ბევრი ქართველი მართლმადიდებელი. რაც მოხდა ადიგენში, წინასწარგანზრახული, ძალიან ცუდი შინაარსის პროვოკაცია, რომელიც საბოლოო ჯამში აპირისპირებს ქართველს ქართველთან და ეს არის გაგრძელება მრავალთვიანი ტენდენციის. ის, რომ წინა მთავრობის დროს ასე არ ხდებოდა, ეს არ იყო შიშის ბრალი, ეს იყო იმის გამო, რომ ჩვენ ყველანი მუდმივად ვიმეორებდით, რომ საქართველოში არის ყველა თანასწორი. მე მოვუწოდებ მთავრობას, შეწყვიტოს შურისძიების ენით ლაპარაკი, მე მოვუწედებ ყველას, რომ ერთმანეთთან ვიმუშაოთ სამოქალაქო მშვიდობის მიღწევის კუთხით, ამავე დროს მინდა ვთქვა, რომ ჩვენი რთული გეოპოლიტიკის გათვალისიწინებით, როცა მეზობლები გვყავს თურქეთი, აზერბაიჯანი და სხვა ქვეყნები და ეს მათთანაც გვიქმნის პრობლემებს, პრაქტიკულად ჩვენ ვრჩებით პირისპირ მხოლოდ ერთი მეზობლის, ჩვენი დამპყრობლის, რუსეთის მიმართ. ასეთი პროვოკაციების შედეგად ჩვენ ვრჩებით დაუცველები. მინდა მთავრობას მოვუწოდო, რომ ჩამოაყალიბოს მწყობრი პოლიტიკა და გამოხატოს პოზიცია რათა მომავალში ვერავინ ვერ შეძლოს ასეთი რამის გაკეთება, მუსლიმებისთვის მინარეთის მოხსნა იგივეა, რაც მართლმადიდებლებისთვის და საერთოდ ქრისტიანებისთვის, ეკლესიიდან ჯვრის მოხსნა და ამას აქვს თავისი შედეგები. მე აქ მოვედი, მეჩეთის წინ, სწორედ იმის გამო, რომ დავით აღმაშენებლის ტრადიციაა საქართველოში, რომ საქართველოს მმართველები, პოლიტიკოსები, ყველა აღმსარებლობას ერთნაერად სცემდნენ პატივს და მე როგორც მართლმადიდებელმა, მინდა გამოვხატო სრული პატივისცემა ჩვენი მუსლიმი სისხლის და ხორცის მიმართ. საქართველოში არის რამდენიმე ასეული ათასი მუსლიმი, მსოფლიოში არის რამდენიმე მილიონი მუსლიმი ქართველი და არავის არა აქვს უფლება რაიმე სახის შუღლი ჩამოაგდოს მათსა და დანარჩენ ქართველებს შორის– განაცხადა ბათუმში ვიზიტისას მიხეილ სააკაშვილმა. 

ამ წუთებში,  სამმართველოს შენობიდან გამოვიდა სრულიად საქართველოს მუსლიმთა სამმართველოს მუფთი ჯემალ პაქსაძე, მან შეკრებილებს მოლაპარაკების დეტალები გააცნო. მისი თქმით სიტუაცია განმუხტულია და დაკავებულ ადამიანებს უახლოესი ერთი საათის განმავლობაში გამოუშვებენ, რაც შეეხება მინარეთს ჯემალ პაქსაძემ განაცხადა, რომ დაკავებულების გათავისუფლების შემდეგ მინარეთის აღდგენის საკითხზე მუშაობა დაიწყება.

ამ დროისათვის,  ახალციხის რაიონულ სასამართლოში 3 პირის სასამართლო პროცესი დასრულდა, ბადრი და ემზარ ჩოგაძეებს და დავით ბერიძეს ადმინისტრაციული სამართალდარღვევათა კოდექსის 173 მუხლის გათვალისწინებით, ( სამართალდამცავებისათვის წინააღმდეგობის გაწევა) თითოეულს  400 ლარიანი ჯარიმა დაეკისრათ. პროცესს ესწრებოდა საქართველოს ახალგაზრდა იურისტთა ასოციაციის წარმომადგენელი მაია გრძელიშვილი. როგორც ,,ექოს“ საიას გორის ოფისის  ხელმძღვანელმა ქეთი ბებიაშვილმა განუცხადა, სამივე  დაკავებულს სხეულზე დაზიანებები აღენიშნება. მისივე ინფორმაციით, სასამართლო პროცესზე,  დაკავებულებს არ ჰყავდათ ადვოკატი. სამივე მათგანმა პროცესის დასრულების შემდეგ განაცხადა, რომ ჰქონდათ თუ არა  ადვოკატის აყვანის უფლება, მათ არ იცოდნენ. ამბობენ, რომ ადვოკატის არსებობის შემთხვევაში განსხვავებულ ჩვენებებს მისცემდნენ. ბადრი ჩოგაძე არასრულწლოვანია და მის პროცესს მამა ესწრებოდა.  პროცესს მოსამართლე მარიკა ჩიტაშვილი უძღვებოდა.

ამ წუთებში სამცხე–ჯავახეთის სამხარეო სამმართველოში სრულიად საქართველოს მუფთი ჯემალ პაქსაძე მივიდა. “შეურაცხყოფილები ვართ, ადიგენის რაიონის სოფელ ჭელაში მომხდარის გამო. კიდევ ერთხელ გამოვთქვამთ მწუხარებას იმ დაზარალებული მრევლის გამო, რომლებიც დღეს დააკავეს. მე ღვთის წინაშე ვამბობ, რომ ეს არის მოუხდელი ცოდვა”–განაცხადა გუშინ ჯემალ პაქსაძემ. მისივე თქმით, მასალა სარფის საბაჟოზე უკანონოდ იყო შემოტანილი, მოხდება მისი ხელმეორედ განბაჟება და მინარეთი მეჩეთს დაუბრუნდება.  მუფთი ჯერ არ გასაუბრებია ახალციხეში შეკრებილ აქციის მონაწილეებს. მუსლიმები სამმართველოდან მის გამოსვლას ელიან.

,,ჭელაში ეკლესიის მშენებლობაზე აჭარელმა მუსლიმებმაც ვიმუშავეთ”

სოფელ ჭელაში, ისლამური მინარეთის დემონტაჟთან დაკავშირებით განცხადებას ავრცელებს. მას უცვლელად გთავაზობთ: ,,მიმდინარე წლის 26 აგვისტოს, ადიგენის მუნიციპალიტეტის სოფელ ჭელაში მდებარე მეჩეთის მინარეთის დემონტაჟთან დაკავშირებით, შემოსავლების სამსახური საზოგადოების ინფორმირების მიზნით განმარტავს: ინდ/მეწარმე ჯამბულ აბულაძემ 14 ივლისს, მინარეთის ასაწყობი ლითონის კონსტრუქცია თურქეთის რეპუბლიკიდან საქართველოს შემოიტანა.  საქართველოს კანონმდებლობის თანახმად, შემოსავლების სამსახურისსაბაჟო დეპარტამენტის ინფორმაციის დამუშავების, გაცვლისა და რისკების მართვის სამმართველოს მიერ, ელექტრონული ბაზის ანალიზის შედეგად შეირჩა კონკრეტული სეს ესნ. კოდით ასახული სასაქონლო საბაჟო დეკლარაცია. აღნიშნული დოკუმენტაციის ანალიზის შემდგომ გაჩნდა საფუძვლიანი ეჭვი, რომ საბაჟო დეკლარაციასა და მის თანმხლებ დოკუმენტაციაში მითითებული საქონლის არასწორად კლასიფიცირებამ შეიძლება გამოიწვიოს იმპორტის გადასახდელების ოდენობის შემცირება. აღნიშნული ოდენობის შემცირების დადგენა ფიზიკური დათვალიერებისა და შესაბამისი ექსპერტიზის დასკვნის გარეშე შეუძლებელია.   აღნიშნული გარემოებებიდან გამომდინარე, საქართველოს ფინანსთა მინისტრის 2012 წლის 26 ივლისის №290 ბრძანებით დამტკიცებული „საქართველოს საბაჟო ტერიტორიაზე საქონლის გადაადგილებისა და გაფორმების შესახებ“ ინსტრუქციის 113-ემუხლის პირველიპუნქტის „ა“ ქვეპუნქტისა და მე-3 პუნქტის, 115- ე მუხლის შესაბამისად დაინიშნა ინდ/მეწ. „ჯამბულ აბულაძე“-ს (ს/ნ 03001016768) მიერ მიმდინარე წლის 14 ივლისს N11112/C-12971 სასაქონლო საბაჟო დეკლარაციით გაფორმებული საქონლის გაშვების შემდგომი გასვლითი შემოწმება.  21 აგვისტოს, შემმოწმებელთა ჯგუფი მივლინებულ იქნაინ დ/მეწ. ,,ჯამბულ აბულაძე’’-ს იურიდიულ მისამართზე,  რათა განეხორციელებიათ კანონმდებლობით გათვალისწინებული მოვალეობები. შემმოწმებელთა ჯგუფის მიერ წარმოდგენილი N39828 ბრძანება – საქონლის გაშვების შემდგომი გასვლითი შემოწმების შესახებ ჩაბარდა ჯამბულ აბულაძის მეუღლეს. აღნიშნული ბრძანება ასევეგაგზავნილი იქნა საქართველოს ფოსტით და ატვირთა პირის ელექტრონულ მისამართზე.    ვინაიდან მინარეთის კონსტრუქცის  წონა და სასაქონლო კოდი შესაძლოა არშეესაბამებოდეს დეკლარირებულ მონაცემებს, შემოსავლების სამსახურის გადაწყვეტილებით 26 აგვისტოს, მოხდა მისი დემონტაჟი. ამასთან აღსანიშნავია, რომ მინარეთის კონსტრუქციის დემონტაჟს და შემდგომ მისი აღდგენით სამუშაოებს უზრუნველყოფს შემოსავლების სამსახური.  ფინანსთა სამინისტროს შემოსავლების სამსახური თხოვნით მიმართავს ადგილობრივ მოსახლეობას, ყველა დაინტერესებულ პირს, არ დაუშვან აღნიშნული ფაქტის პოლიტიზირება და შესაბამის სამსახურებს მიეცეთ საშუალება სწრაფად და სრულყოფილად ჩაატარონ სასაქონლო ექსპერტიზა.  სსიპ შემოსავლების სამსახური”    

    ამ წუთებში, 20–მდე ავტომანქანით მუსლიმი მაცხოვრებლები ადიგენიდან  ქალაქ ახალციხისაკენ მიემართებიან. სავარაუდოდ, ისინი სოფელ ჭელაში სამართალდამცავების მიერ დაკავებული 11 ადამიანის მხარდასაჭერად აქციის გამართვას გეგმავენ.   მოვლენათა განვითარებას ,,ექოს” გადამღები ჯგუფი პერიოდულად მოგაწვდით.

22 მეტრიანი მინარეთის კონსტრუქცია სოფელ ჭელაში დღეს დაიშალა, იგი სამართალდამცავებმა სოფლიდან გაიტანეს. აღნიშნულ ფაქტს ჭელაში მცხოვრები მუსლიმები აპროტესტებენ. ამბობენ, რომ მათთვის უცნობი იყო, როდის აპირებდა ადგილობრივი თვითმმართველობა მინარეთის დაშლას. ადგილობრივების თქმით, მათზე ფიზიკური ზეწოლა განხორციელდა. ჭელის მკვიდრები ამბობენ, რომ აღნიშნულ ფაქტს ისინი რეაგირების გარეშე არ დატოვებენ და ყველა საჭირო ინსტანციას მიმართავენ. სოფელ ჭელაში მინარეთის კონსტრუქციის დემონტაჟმა სამართალდამცავებსა და ადგილობრივ მუსლიმ მოსახლეობას შორის დაპირისპირება გამოიწვია.  როგორც ადგილობრივი მოსახლეობა ამბობს, დაკავებულია 11 ადამიანი, რომლებიც ამ დროისათვის,ახალციხის სამმართველოში    გადაიყვანეს. სოფელ ჭელაში ამ წუთებში ,,ექოს” კორესპონდენტი, შორენა სურმანიძე იმყოფება. მისი თქმით, დემონტაჟის დროს  ჭელისკენ მიმავალი გზა გადაკეტილი იყო. ტერიტორიაზე არ უშვებდნენ მედიის წარმომადგენლებსაც. ჭელაში განვითარებულ მოვლენებს ,,ექოს” გადამღები ჯგუფი პერიოდულად მოგაწვდით.

19 აგვისტოს მართლმადიდებლურმა სამყარომ ფერისცვალების დღესასწაული აღნიშნა. ეს დღე იზეიმეს ახალციხეშიც. მაცხოვრის ამაღლების სახელობის ეკლესიაში დღესასწაულთან დაკავშირებული წირვა ლოცვა ტაძრის წინამძღვარმა მამა დავითმა აღავლინა.