წამებისა და არაადამიანური მოპყრობის ამსახველი კადრები ინტერნეტ სივრცეში კიდევ ერთხელ გავრცელდა. ვიდეოჩანაწერის გასაჯაროვებამ, ისევე როგორც სამი წლის წინ, ამჯერადაც საზოგადოების დიდი ნაწილის აგრესია გამოიწვია. რატომ ხდება წამების ამსახველი ვიდეო პერიოდულად ყველასთვის ხელისაწვდომი და როგორ მოქმედებს იგი რიგით ადამიანზე, რომელსაც მასალის ნახვა სოციალურ ქსელში დაუბრკოლებლად შეუძლია – ფსიქოლოგებისა და სამოქალაქო სექტორის შეფასებები ფსიქოლოგიური ასპექტების შესახებ.
ბოლო დღეების განმავლობაში, ადამიანის წამების ამსახველ ე.წ ,,ციხის კადრებზე“, საზოგადოება კიდევ ერთხელ ალაპარაკდა. ჩანაწერი, რომელიც პირველად 2012 წლის 18 სექტემბერს გასაჯაროვდა, საზოგადოების აგრესიის მიზეზი გახდა. სამი წლის შემდეგ, მსგავსი ვიდეო კვლავ გავრცელდა, ოღონდ ამჯერად უკრაინული ვიდეოპორტალის საშუალებით.რამდენიმე საათში კი მასალამ სოციალური ქსელი მოიცვა, სივრცე, რომლის მომხმარებელიც თითქმის ყველა ასაკის წარმომადგენელია. როგორ მოქმედებს წამების ამსახველი კადრების ყურება ადამიანის ფსიქიკაზე და არსებობს თუ არა მასალის პერიოდულად გავრცელების აუცილებლობა, ამის შესახებ ,.,მე–9 არხი“ ფსიქოლოგებს ესაუბრა. სპეციალისტები განმარტავენ, რომ მსგავსი კადრების ნახვა უარყოფითი ზეგავლენას პირველ რიგში ბავშვებსა და მოზარდ თაობაში გამოიწვევს.
რაც ვნახე საშინელება იყო; ამაზრზენია; ბოლომდე ყურება ვერ შევძელი; რამდენჯერ შეიძლება გავრცელდეს? – ასე აფასებენ წამების ამსახველი ვიდეოს–მასალის გავრცელებას ახალციხელები. გამოკითხულთა უმრავლესობა აქცენტს ახალგაზრდა თაობაზე აკეთებს და ამბობს, რომ ვიდეოს პერიოდული გავცელება ხელს უწყობს მოზარდები მოძალადეებად ჩამოყალიბდნენ. საზოგადოების ნაწილს კი მიაჩნია, რომ ამ გზით ინფორმაციას იღებს, თუ რა ხდება რეალურად საპატიმროებში.
გარდა იმისა, რომ ბოლო სამი დღის განმავლობაში ვიდეომ სოციალური ქსელი მოიცვა, ქალაქ ზუგდიდში, დიდი ეკრანზე, კადრების საჯაროდ ჩვენება მოეწყო, რომელსაც ქალაქის ადგილობრივი თვითმმართველობის წევრებიც დაესწრნენ. აღნიშნული ფაქტი მიუღებლად მიაჩნიათ არასამთავრობო ორგანიზაციის წევრებს. ისინი ხელისუფლებისგან სამართლებრივი კუთხით დროულ რეაგირებას მოითხოვენ.
წამების ამსახველი კადრები, რომელიც 17 ოქტომბერს ჯერ უკრაინულ, შემდეგ კი ქართულ ინტერნეტ საიტებზე გავრცელდა, სავარაუდოდ, სამეგრელოში, მიწისქვეშა სამალავში აღმოჩენილი ვიდეოფირების ნაწილია. შსს-ს ცნობით, კადრებში წინა ხელისუფლების წარმომადგენლების მიერ ასახული იყო სხვადასხვა საჯარო პირის პირადი ცხოვრება, ასევე, სხვადასხვა პირთა ცემის, წამების, ღირსების შემლახავი მოპყრობისა და სექსუალური ძალადობის ამსახველი ვიდეომასალა. მსგავსი კადრები მასშტაბურად 2012 წლის 18 სექტემბერს, არჩევნებამდე ორი კვირით ადრე გავრცელდა.
