რესტორან ,,ჯინო ველნესში" დაწყებული სიტყვიერი შელაპარაკება ხუთ ახალგაზრდასა და ,,ბრითიშ პეტროლიუმის" სამ თანამშრომელს შორის ფიზიკურ
დაპირისპირებაში გადაიზარდა. ინციდენტი 1–ლ დეკემბერს, ახალციხის ციხის ტერიტორიაზე მდებარე რესტორანთან მოხდა.

3 დეკემბერს, მოსამართლე გოჩა ჯეირანაშვილმა ოთხ მათგანს  ვ.ს. – ს,  ბ.ს. – ს,  გ.ხ. – სა და  გ.გ. – ს აღკვეთის ღონისძიებად პატიმრობა შეუფარდა, ხოლო მეხუთეს მ.წ–ს 30 ათას ლარიანი გირაოს გადახდა 30 დღის ვადაში დააკისრა.

გ.ხ. –ს ადვოკატის განცხადებით, ჩვენებაში მხოლოდ ბლაგვი საგანი ფიგურირებს, თუმცა საქმეში ბევრი საკითხი ბუნდოვანია. ნუგზარ სამარჯიშვილი აცხადებს, რომ

,,სამართალდამცველებმა დილის შვიდიდან ათ საათამდე პერიოდში ახალგაზრდები დაკითხეს, შემდეგ გაუშვეს და შუადღით, დაახლოებით სამის ნახევარზე პროკურატურა სასამართლოში მათი დაკავების მოთხოვნით შევიდა. საქმეში იარაღი არსად ფიგურირებს – არც დანა, არც კასტეტი, მხოლოდ ერთს აქვს ჩვენება მიცემული – მგონი ბლაგვი საგანი იყოო, თუმცა კადრებში არანაირი საგანი არ ჩანს და მხოლოდ ჩვენების საფუძველზე მოხდა, მათი დაკავება".

სასამართლოს გადაწყვეტილებას არც ვ.ს –ს ადვოკატი ეთანხმება. ეკა აბაშიძე ფიქრობს, რომ პოლიციელები რეალობის დადგენას არ ცდილობენ და გარკვეულ პირებს სიმართლის დამალვაში ეხმარებიან.

,,ჩემი დაცვის ქვეშ მყოფი ინციდენტში საერთოდ არ ჩარეულა, ვიდეოთვალში ჩანს, რომ შედის და მერე კამათით გამოდის ვიღაცასთან ერთად, სადაც ეუბნება, გამიშვიო, ეს დაუდეს საფუძვლად და ხულიგნობის მუხლით გაასამართლეს, რაც შეეხება ბ.ს – ს, მისთვის არავის დაურეკავს, არც მიუკითხებია ვინმეს და პროკურორმა ბრალი დაუმძიმა, გამოძიებას ემალებაო, არადა სახლში იყო და არც არსად წასულა".

გამოძიება სსკ–ის 239–ე მუხლის მესამე ნაწილით დაიწყო, რომელიც გულისხმობს ხულიგნობას ძალადობით ან ძალადობის მუქარით და ისჯება თავისუფლების აღკვეთით ვადით 4–დან 7 წლამდე.

წინასასამართლო სხდომა 2018 წლის 25 იანვარს ჩაინიშნა.