გოგოლაძეების ოჯახი მათი შვილის გარდაცვალების საქმის გამოძიებას და დამნაშავის დასჯას ითხოვს. მშობლებს ეჭვი აქვთ, რომ გამოძიება საქმის გახსნითა და ბრალდებულის დაკავებით დაინტერესებული არ არის. გოგოლაძეები ამბობენ, რომ მათ ეჭვებს არაერთი ფაქტი უმყარებს. მიუხედავად იმისა, რომ შემთხვევას რამდენიმე მოწმე ჰყავს და საჭესთან მჯდომი პირის ვინაობაც ყველასთვის ცნობილია, შემთხვევიდან ერთი თვის შემდეგ, დამნაშავე დაკავებული არ არის.
ავტოსაგზაო შემთხვევა პირველ მაისს, აღდგომის ღამეს მოხდა, როცა ლევან გოგოლაძე, მეგობართან ერთად, სოფელ ბოლაჯურიდან სახლში, დიდ სმადაში ბრუნდებოდა. 20 წლის ახალგაზრდას ავტომობილი დაეჯახა, რომელშიც სამი პირი იჯდა. თავის ქალის მძიმე დაზიანებით, მამაკაცი იმავე ავტომობილით, ადიგენის რაიონულ ჰოსპიტალში მიიყვანეს. ჯანმრთელობის მძიმე მდგომარეობის გამო, ლევან გოგოლაძე, კატასტროფის ბრიგადამ, თბილისში გადაიყვანა. თუმცა გზაში მისი მდგომარეობა დამძიმდა და დაშავებული გორის საავადმყოფოში შეიყვანეს. ლევან გოგოლაძემ მხოლოდ სამი დღე იცოცხლა. ახალგაზრდა მამაკაცი 10 მაისს დაკრძალეს.
გოგოლაძეები უბედურ შემთხვევას, ცოტა ხნით ადრე, სოფელში მომხდარ ინციდენტს უკავშირებენ. როგორც ისინი ყვებიან, სავარაუდო ბრალდებული თანასოფლელებს ეჩხუბა, რა დროსაც ლევან გოგოლაძე და მისი მამა, მეგობრებს გამოესარჩლნენ. გარდაცვლილის მშობლები არ გამორიცხავენ, რომ აღდგომის ღამეს, ნასვამმა მამაკაცმა, გოგოლაძეზე შური იძია და მანქანით განზრახ დაეჯახა.
ოჯახს ეჭვებს გარდაცვლილის მეგობრის საქციელიც უმძაფრებს, რომელიც ავტოსაგზაო შემთხვევისას, ლევან გოგოლაძეს თან ახლდა. მშობლები ამბობენ, რომ შემთხვევის შემდეგ, ახალგაზრდამ მათთან ყოველგვარი კონტაქტი გაწყვიტა. მან ადიგენის ჰოსპიტალში, გარდაცვლილის მამას ისიც უთხრა, რომ არ დაუნახავს ვინ დაეჯახა ლევან გოგოლაძეს მიუხედავად იმისა, რომ დაზარალებული ჰოსპიტალში, იმავე მანქანით გადაიყვანეს. გოგოლაძეებს საეჭვოდ ეჩვენებათ ისიც, რომ მეგობარს, ავტოავარიისას დაზიანება არ მიუღია.
გოგოლაძეები ამბობენ, რომ დამნაშავის გამოსარკვევად და საქმის დეტალების გამოსაკვეთად, გამომძიებლებს ერთი თვე ჰონდათ, მიუხედავად ამისა, გამოძიება იგივე ეტაპზეა. გარდაცვლილის მშობლების თქმით, ოჯახის წევრები და თვითმხილველები, მხოლოდ მათი მოთხოვნის შემდეგ დაკითხეს. ოჯახი არც იმას გამორიცხავს, რომ სავარაუდო ბრალდებულს ხელს მმართველი პარტიის წარმომადგენლები აფარებენ, რადგან იგი 2012 წლიდან, ,,ქართული ოცნების“ მხარდამჭერია.
გოგოლაძეები ამბობენ, რომ შემთხვევის შემდეგ, სავარაუდო ბრალდებული სოფელში აღარ გამოჩენილა. მისი ნათესავები კი ამბობენ, რომ მამაკაცის ადგილსამყოფელი არ იციან. გარდაცვლილის მშობლები შიშობენ, რომ აღნიშნული პირი მიმალვაშია და შესაძლოა ის პოლიციამ ვეღარ დააკავოს.
შსს–ში კი ამბობენ, რომ მხილებული მართლაც არსებობს. იმისთვის, რომ აღნიშნული პირი ბრალდებულად იქნეს ცნობილი, უწყება შესაბამისი ექსპერტიზის პასუხებს ელის. სამინისტროში მისი მიმალვის საფრთხეს ვერ ხედავენ. საქმეს ადიგენის რაიონული სამმართველო იძიებს. შსს–ოს ინფორმაციით, გამოძიება სისხლის სამართლის კოდექსის 276 მუხლის მე–5 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც ადამიანის სიცოცხლის მოსპობა გამოიწვია. ისჯება თავისუფლების აღკვეთით ვადით ოთხიდან შვიდ წლამდე.
