ახალქალაქის ისტორიაში პირველად საქპატენტმა ბრენდი „ახალქალაქის კარტფილი“ დააპატენდა, რომელიც სუპერმარკეტებში აქტიურად გაიყიდა. ასოციაციის პრეზიდენტმა „ფერმერის საათს“ ჯავახეთში უმასპინძლა. რეპორტაჟში ახალქალაქელი ფერმერის წარმატებების გარდა, ახალციხის სასოფლო–საკონსულტაციო სამსახურის საქმიანობაცაა ასახული.
საქართველოს წამყვან სუპერმარკეტებში ახალქალაქის კარტოფილი პირველად გასულ წელს შეიტანეს. სკეპტიკური განწყობის მიუხედავად, დაფასოებული პროდუქტი უფრო აქტიურად გაიყიდა, ვიდრე ტომრებით შეტანილი. ასოციაცია „ახალქალქის კარტოფილის“ გამგეობის თავმჯდომარის თქმით, ბრენდირებულის მიმართ სანდოობა ბევრად მაღალია. გარდა ამისა, მომხმარებელმა იცის, რომ ახალქალაქში წარმოებული კარტოფილი კარგი პროდუქტია. შედეგად ბაზარზე მოთხოვნილება გაჩნდა.
მახარე მაცუკატოვს რეგიონების ეკონომიკური განვითარების პროგრამასთან თანამშრომლობის მრავალწლიანი გამოცდილება აქვს. პროგრამის მიერ გამოცხადებული საგრანტო კონკურსისთვის მან მეგობრებთან ერთად ახალქალქში შპს „ჯავახეთის აგრო–კოპანია“ შექმნა და კარტოფილის დასახარისხებელი დანადგარი შეიძინა. შედეგად კულტურის გადარჩევა, ბევრად სწრაფად და მარტივად ხდება.
დღეისათვის მახარე მაცუკატოვი სხვა ფერმერებთან ერთად ასოციაცია “ახალქალაქის კარტოფილს” ამუშავებს. მის შემადგენლობაში რვა კოოპერატივი შედის. ფერმერული გაერთიანებების მეშვეობით იგი მარაგის დაგროვებას გეგმავს, რათა შემდეგ ბრენდირებული კარტოფილი სუპერმარკეტებს ამოუწურავად შესთავაზოს.
რეგიონების ეკონომიკური განვითარების პროგრამის მეშვეობით გააფართოვა საქმიანობა ახალციხის სასოფლო საკონსულტაციო სამსახურმაც. პროგრამის მხარდაჭერით, სამი წლის წინ საკონსულტაციო სამსახურმა მეკარტოფილე–ფერმერებთან ტრენინგები დაიწყო, შემდეგ კი კონსულტანტებმა ოთხ ჰექტარ სადემონსტრაციო ნაკვეთზე ორი ჯიშის კარტოფილი დათესეს. გურამ ჯინჭველაძე ამბობს, რომ სამომავლო საქმიანობის გაძლიერების მხრივ პროგრამამ მათ სამსახურს დიდი იმპულსი მისცა.
სპეციალისტები თანხმდებიან, რომ ფერმერებისთვის, არასამთავრობო თუ სამთავრობო სექტორის მხარდაჭერა მნიშვნელოვანი და გადამწყვეტია. ამისთვის კი აუცილებელია ასოციაციებისა თუ ფერმერული მეურნეობების ჩამოყალიბება, რადგან ცალკეულ ფერმერისთვის მიზნის მიღწევა ბევრად რთულია. ბრენდირებული და დაფასოებული პროდუქტის შექმნა კი სარეალიზაციო ბაზრების გარანტიაა.