წინასაარჩევნოდ ახალი პოლიტიკური მოძრაობა – სახელმწიფო ხალხისთვის ყალიბდება”, რომელსაც სათავეში “საქართველოს განვითარების ფონდის” დამფუძნებელი პაატა ბურჭულაძე ჩაუდგება. პოლიტიკაში წასვლის თაობაზე მან განცხადება დღეს, 12 მაისს გაავრცელა.
„ამოცანა შემდეგია: ჩვენ უნდა შევცვალოთ ხალხი პოლიტიკაში, ჩვენ უნდა შევცვალოთ თავად პოლიტიკა და გვექნება შანსი შევცვალოთ ქვეყანა. ეპოქა დასრულდა! ჩვენ, უბრალოდ, უნდა გავაცნობიეროთ ეს! აღარ არის პოლიტიკაში არც უმეცრების, არც უსინდისოების ადგილი, ისინი მაინც იქნებიან, მაგრამ შევეცადოთ, რომ ისინი იყვნენ უმცირესობაში. რას გპირდებით? ბრძოლას! ჩვენ ვიწყებთ პოლიტიკურ მოძრაობას „სახელმწიფო ხალხისათვის“
ქვეყნის მმართველი პოლიტიკური პარტიის წარმომადგენელი ახალციხეში აცხადებს, რომ ბურჭულაძის პოლიტიკაში წასვლის თაობაზე ინფორმაცია არ აქვს და შესაბამისად კომენტარს ვერ გააკეთებს. გიორგი კოპაძისგან განსხვავებით, „გაერთიანებული დემოკრატიული მოძრაობის“ კოორდინატორი სამცხე–ჯავახეთში ჯიმშერ გოგოლაური მიიჩნევს, რომ მომღერლის ადგილი პოლიტიკაში არ არის.
„ბურჭულაძე პოლიტიკაში „საქართველოს განვითარების ფონდის“ დაარსების დროს მოვიდა“ – აცხადებს „ერთიანი ნაციონალური მოძრაობის“ წარმომადგენელი საქართველოს პარლამენტში. ვაჟა ჩიტაშვილს მიაჩნია, რომ ბურჭულაძის პარტიამ შესაძლოა ბარიერი გადალახოს, თუმცა კონკურენციას ვერ გაუწევს, რადგან მას პოლიტიკური გამოცდილება არ აქვს.
ის ფაქტი რომ ღირსეული პიროვნებაა და მაღალი დონის მომღერალია, არ ნიშნავს, რომ პოლიტიკაშიც ასეთივე იქნება, მიაჩნია „თავისუფალი დემოკრატების“ ახალციხის ორგანიზაციის თავმჯდომარეს. შალვა გოგოლაძის თქმით, პაატა ბურჭულაძის მხრიდან გულწრფელი სურვილები იქნება, თუმცა, ეს წარმატებული პოლიტიკოსობისთვის საკმარისი არ არის.
ახალი პოლიტიკური ცენტრის „გირჩი“– ს ახალციხის ოფისში აცხადებენ, რომ პაატა ბურჭულაძის პოლიტიკაში წასვლა სიახლე არ არის, თუმცა მისი ქმედება გარკვეულ კითხვებს აჩენს.
პაატა ბურჭულაძემ ახალციხეში „საქართველოს განვითარების ფონდი“ მიმდინარე წლის 4 თებერვალს გახსნა. სამცხე–ჯავახეთში კიდევ ერთი ოფისი ახლო მომავალში ასპინძაში გაიხსნება, რომელსაც ახალციხის საკრებულოს დეპუტატი და ყოფილი თავმჯდომარე კახა ბერიძე უხელმძღვანელებს. როდის ჩაერთვება ფონდი პოლიტიკურ საქმიანობაში, ამ დეტალებზე ჯერჯერობით საუბრობენ.
