სოფელ ზიკილიაში მცხოვრები ნანა ჩუბინიძე ერთადერთი შემოსავლის – სოციალური დახმარების გარეშე დარჩა. ორსულიან ოჯახში არცერთი წევრი მუშაობს. ჩუბინიძეები საერთო საცხოვრებელში გაუსაძლის პირობებში ცხოვრობენ. ასაკიდან გამომდინარე, არ იღებენ პენსიას. ყოველდღიურ საკვებს მეზობლები რიგრიგობით აწვდიან.
როგორც მეზობლები „მეცხრე არხთან ჰყვებიან, ნანა ჩუბინიძეს ფსიქიკური პრობლემები აქვს, მისი მეუღლე კი სმენადაქვეითებულია. ამბობენ, რომ ოჯახში წევრთა რაოდენობის შემცირების გამო, დეკლარაციის შევსებისას, აგენტს დიასახლისმა არასწორი ინფორმაცია მიაწოდა. მეზობლების თქმით, სოციალურმა აგენტმა მისი მდგომარეობა არ გაითვალისწინა, შედეგად ერთადერთი შემოსავალი შეუწყდა.
სოციალური მომსახურების სააგენტოში განმარტავენ, რომ დეკლარაციაში ცოლ–ქმარი სრულიად ჯანმრთელ მოქალაქეებად არიან დაფიქსირებულნი, თუ ოჯახი ჯანმრთელობის მდგომარეობის თაობაზე შესაბამის დოკუმენტაციას მოიპოვებს, დეკლარაციაში ცვლილება შევა. სამცხე–ჯავახეთის სოციალური მომსახურების ცენტრის უფროსი ოჯახს უბნის ექიმთან მისვლას ურჩევს, რომელიც მათ საბუთის მისაღებად იანსტრუქციას მისცემს. დავით გოგალაძის თქმით, დეკლარაციის გადახედვა მოხდება იმ შემთხვევაშიც, თუ მიწის საკუთრების დამადასტურებელ დოკუმენტს წარადგენენ, რომლის მეშვეობითაც სხვაობა დაფიქსირდება.
სოციალური დახმარების შეწყვეტის გარდა, ჩუბინიძეებისთვის პრობლემა გახდა სესხიც. მეზობლების თქმით, ერთ–ერთმა თანასოფლელმა ნანა ჩუბინიძეს ბანკიდან 6 000 ლარი გამოატანინა, ფული კი თავად აიღო. ბოლო პერიოდში ყოველთვიური შესატანი თანხა ვეღარ გადაიხადა. ბანკის თანამშომლები კი სესხის გადახდას ჩუბინიძეებისგან ითხოვენ.
„ნანა ჩუბინიძეს დასახმარებლად გამგეობისთვის არ მიუმართავს, შესამაბისად მის შესახებ ინფორმაცია არ მაქვს“ – აცხადებს გამგებლის წარმომადგენლის მოვალეობის შემსრულებელი აგარის ტერიტორიულ ერთეულში. გრიგოლ ღამბაშიძის თქმით, აღნიშნული ოჯახის მდგომარეობას გადაამოწმებს და მის შესახებ ინფორმაციას ხელმძღვანელობასაც მიაწვდის.
გრიგოლ ღამბაშიძის თქმით, ჩუბინიძეების ოჯახს გამგეობა შეძლებისდაგვარად დაეხმარება. იგი განმარტავს, რომ თვითმმართველობისგან ერთჯერადი დახმარებით სოციალურად დაუცველები, დევნილები და შეზღუდული შესაძლებლობების მქონე პირები სარგებლობენ. მისივე თქმით, ნანა ჩუბინიძის მდგომარეობის გათვალისწინება სამომავლოდ აუცილებლად მოხდება.
