ახალციხის რაიონული სასამართლოს გადაწყვეტილებას, გიორგი კოპაძე
სააპელაციო სასამართლოში გაასაჩივრებს. ამის შესახებ მან ,,მე–9
არხის“ ჟურნალისტს, სატელეფონო საუბრისას განუცხადა.
,,ვადები მაქვს. გავასაჩივრებ როცა საჭირო იქნება. რას ნიშნავს ნაწილობრივ დაკმაყოფილება? მესამეში მართალია და მეორეში არ არის?“ – ამბობს გიორგი კოპაძე.
ახალციხის რაიონულ სასამართლოში ამბობენ, რომ 23 მარტს მიღებული მოსამართლის გადაწყვეტილების წასაღებად, მხარეებს ერთი თვე ჰქონდათ, მაგრამ დოკუმენტს, სასამართლოში არც ერთმა მიაკითხა. გია ბერაიას გადაწყვეტილება ძალაში 12 დღეში შევა. ათვლა 23 აპრილს დაიწყო. ქალაქის მერს, გასაჩივრებისთვის ორი კვირა აქვს.
შეგახსენებთ, რომ ქალაქ ახალციხის მუნიციპალიტეტის საკრებულოს დეპუტატმა ჯიმშერ გოგოლაურმა ახალციხის რაიონულ სასამართლოში ქალაქის მერის წინაღმდეგ სამოქალაქო დავა მოიგო. მოსამართლემ გოგოლაურის მოთხოვნა – გიორგი კოპაძეს ადგილობრივი მედიის საშუალებით მისთვის ბოდიში მოეხადა, ნაწილობრივ დააკმაყოფილა. გია ბერაიას გადაწყვეტილებით, ქალაქის მერს „მეცხრე არხის“ ეთერში გაჟღერებული ცილისმწამებლური ინფორმაციის უარყოფა დაევალა.
მხარეების დაპირისპირება 2015 წლის 10 დეკემბერს „მე–9 არხის “ გადაცემა „დიალოგის“ პირდაპირ ეთერში, ახალციხის 2016 წლის ბიუჯეტის პროექტის განხილვას მოჰყვა. გოგოლაურის თქმით, კოპაძემ გადაცემაში მას ბრალი დასდო, რომ ძალოვან უწყებაში მუშაობის პერიოდში პატიმრებს აწამებდა და მათგან სასურველი ჩვენების მიღებას ძალისმიერი მეთოდებით ცდილობდა.
რუსუდან გვარამაძე
