17 ბავშვი სოფელ ყულალისიდან პამაჯამდე, დაახლოებით, ერთი კვირაა სკოლაში ფეხით დადის. ოფიციალური მიზეზი დანიშნული ავტობუსის ტექნიკური გაუმართაობაა, ადგილობრივები კი ფიქრობენ, რომ ოპოზიციური პარტიის მხარდაჭერისთვის ისჯებიან.
სოფელ ყულალისიდან პამაჯამდე 1.5 კმ–ია. სამი წელია ბავშვების სკოლაში გადაყვანას განათლების სამინისტროს ავტობუსი უზრუნველყოფს. ადგილობრივები ფიქრობენ, რომ ხელისუფლება მათ მეორე ტურში მხარდაჭერას თხოვს და ავტობუსის დანიშვნაც სწორედ ამის შემდეგ მოხდება.
ყულალისის მოსახლეობის უფლებებისა და მიღებული ხმების დასაცავად სოფელში “ნაციონალური მოძრაობის” კანდიდატები იმყოფებოდნენ. ვაჟა ჩიტაშვილი განმარტავს, რომ ადგილობრივი ხელისუფლება ოპოზიციის მხარდამჭერი მოსახლეობის ზეწოლას განაგრძობს.
ოპოზიციის ბრალდებებს უარყოფს ახალციხის მუნიციპაილტეტის გამგებლის წარმომადგენელი პამაჯის თემში. კარლენ კარახანიანი აცხადებს, რომ მოსწავლეებს პრობლემები ავტობუსის ტექნიკური გაუმართაობის გამო შეექმნათ. შეკეთების შემდეგ კი ტრანსპორტი ჩვეულ რეჟიმში მოემსახურება.
განათლების სამინისტროში აცხადებენ, რომ სოფელ ყულალისს სასკოლო ავტობუსი ოფიციალურად არასდროს მომსახურებია. რადგან სოფლებს შორის მანძილი კილომეტრნახევარზე ნაკლებია.
ოფიციალური ინფორმაციით, სასკოლო ავტობუსი სოფელ ყულალისისგან განსხვავებით გასული დღეების განმავლობაში სოფელ ორალს ემსახურებოდა.
