ახალციხისა და ტაო–კლარჯეთის ეპარქია მოხის სადავო შენობასთან დაკავშირებით განცხადებას ავრცელებს. მიტროპოლიტმა თეოდორემ პრესკონფერენციაზე შენობაში მუსლიმი მრევლის თვითნებურად შესვლაზე ისაუბრა და შესაბამის სტრუქტურებს მოხესა და მიმდებარე სოფლებში მართლმადიდებელი მრევლის უფლებების დაცვა სთხოვა.
მიტროპოლიტის თქმით, მოხის სადავო შენობასთან დაკავშირებით, შექმნილია სპეციალური კომისია, რომლიც ცდილობს სოფელში მოსახლეობას კეთილმეზობლური ურთიერთობები შეუნარჩუნოს. თუმცა მუსლიმი მრევლის ჯგუფი ნებართვის გარეშე შენობაში შევიდა და მეოთხე დღეა ლოცულობენ.
აღნიშნულთან დაკავშირებით, 13 ოქტომბერს მოხეში იმყოფებოდნენ, რელიგიის საკითხთა სახელმწიფო სააგენტოს ხელმძღვანელი ზაზა ვაშაყმაძე და ქართული სამუფტოს წარმომადგენელი, რომლებიც მართლმადიდებელ მხარეს შეხვდნენ და საკითხი განიხილეს. მეუფე თეოდორეს თქმით, მუსლიმმა მხარემ აღნიშნა, რომ აღნიშნული ქმედებები მათთან შეთანხმებული არ იყო.
“მივმართავთ სახალხო დამცველს, არასამთავრობო ორგანიზაციებს, მედიას,რომ დაიცვან სოფელ მოხესა და მიმდებარე სოფლებში მართლმადიდებელი მოსახლეობის უფლებები, რომლებიც უმცირესობას წარმოადგენენ და გამოიძიონ ვინ გეგმავს ამ პროვოკაციას და ცდილობს გამოიწვიოს დაპირისპირება ქრისტიანებსა და მუსლიმებს შორის.
მოვუწოდებ პოლიტიკურ პარტიებს ამ საარჩევნო პერიოდში ნუ შეეცდებიან ადამიანთა რელიგიური გრძნობები გამოიყენონ თავიანთი პოლიტიკური ინტერესებისთვის.
იმედს გამოვთქვამთ, რომ ჩვენი მუსლიმი თანამემამულეები გამოიჩენენ კეთილგონიერებას, არ აყვებიან პროვოკაციებს და შეწყვეტენ სადაო შენობაში თვითნებურ მოქმედებებს.
ასევე,მოვუწოდებ მართლმადიდებელ მრევლს შეინარჩუნონ სიმშვიდე” – განაცხადა ახალციხისა და ტაო–კლარჯეთის მიტროპოლიტმა.
შეგახსენებთ, რომ ადიგენის მუნიციპალიტეტის სოფელ მოხის ცენტრში არსებული შენობა ქრისტიანებისა და მუსლიმების დაპირისპირების მიზეზი მას შემდეგ გახდა, რაც ადგილობრივმა ხელისუფლებამ ბიბლიოთეკის აშენების გადაწყვეტილება მიიღო და სარეაბილიტაციო სამუშაოები დაიწყო. ადგილობრივი მუსლიმი თემის მტკიცებით, შენობაში ადრე მეჩეთი ფუნქციონირებდა, მართმადიდებლები კი შენობის ქრისტიანულ წარმომავლობაზე საუბრობენ. რამდენიმე დღიანი დაპირისპირების შემდეგ, შენობის ისტორიული კუთვნილების დასადგენად, ხელისუფლებამ შესაბამისი კომისია შექმნა.
“მეცხრე არხის” ჯგუფი მოხეში იმყოფება და მუსლიმი მხარის ჩაწერას ცდილობს. მოხის სადავო შენობასთან დაკავშირებულ სიახლეებს მოგვიანებით მოგაწვდით.
თიკო კურტანიძე
