ქალაქ ახალციხის ადმინისტრაციულ შენობაში, საკრებულოს მეცხრე სხდომა გაიმართა. დეპუტატებმა კენჭი ხუთ საკითხს უყარეს და ა(ა)იპ ,,ქალაქ ახალციხის კულტურის დაწესებულებათა გაერთიანების“ მუშაობის შესახებ, ანგარიში მოისმინეს.

ა(ა)იპ–ში რაბათის, ცენტრალური და საბავშვო ბიბლიოთეკები და კულტურის სახლია გაერთიანებული. დირექტორმა რაბათის ბიბლიოთეკასა და კულტურის სახლში არსებულ პრობლემებზე ისაუბრა და წარმომადგენლობით ორგანოს მათი მოგვარება სთხოვა. ზაირა კელაპტრიშვილის თქმით, რაბათის ბიბლიოთეკაში საჭიროა ერთი შტატის დამატება, ინტერნეტისა და ბუმებრივი აირის შეყვანა. ცენტრალურ და საბავშვო ბიბლიოთეკას არ აქვს იურიდიული მისამართი. დეპუტატებმა ყურადღება კულტურის სახლის შენობის ავარიულ მდგომარეობაზე გაამხავილეს. ა(ა)იპ–ის 2016 წლის ბიუჯეტი 160 940 ლარია, აქედან 114 240 ლარს სახელფასო ფონდი შეადგენს.

კიდევ ერთი საკითხი, რომელზეც საკრებულოს წევრებმა იმსჯელეს, ბიუჯეტში შესული ცვლილებებია. ქალაქ ახალციხის ბიუჯეტს 200 000 ლარი დაემატა. ადგილობრივი ხელისუფლების თქმით, ამ თანხით ინფრასტრუქტურული პროექტები განხორციელდება.