ქალაქ ახალციხის მუნიციპალიტეტის საკრებულომ ბიუჯეტში შესატანი ცვლილებები დაამტკიცა. დეპუტატებმა დღის წესრიგით გათვალისწინებული ოთხი საკითხი განიხილეს.

ახალციხის მერიაში ჯანდაცვის პროგრამის განსახორციელებელ თანხებს 30 000 ლარი დაემატა; 1 375 ლარით გაიზარდა სოციალური დახმარების თანხა, რომელიც შვიდი თვის განმავლობაში ხუთ მხედველობადაქვეითებულ პირს ჩაერიცხება. დაზუსტდა სკოლამდელი აღზრდის დაწესებულების ხარჯები.  ასევე, გაიზარდა ინფრასტრუქტურული მშენებლობისათვის განსაზღვრული თანხები და სხვა – ახალციხის მერიის ბიუჯეტში შესატანი ცვლილებები  საკრებულოს დეპუტატებს  საფინანსო სამსახურის უფროსმა გააცნო.

20 000 ლარი დაემატა ახლადშექმნილი ა(ა)იპ–ის „მდგრადი განვითარების სააგენტოს“ შენახვის ხარჯებს. სხდომაზე, ასევე ცნობილი გახდა, რომ  ა(ა)იპ–ის ვარლამ ნათენაძე უხელმძღვანელებს. მან დეპუტატებს საკუთარი გამოცდილება და სამომავლო ხედვა წარუდგინა.

საკრებულოს სხდომაზე დეპუტატებმა მიწის კომისიის თავმჯდომარის ცვლილებაზე იმსჯელეს. ამიერიდან კომისიას მამუკა მიქელაძე უხელმძღვანელებს. საკრებულოს პირველი პირის განმარტებით ყოფილმა თავმჯდომარემ ზაზა გელაძემ პოზიცია პირადი განცხადების საფუძველზე დატოვა.  კომისიის წევრთა შემადგენლობაში ოპოზიციური პარტიის წარმომადგენელთა დამატება მოითხოვა „გაერთიანებული დემოკრატიული მოძრაობიდან“ საკრებულოს დეპუტატმა ჯიმშერ გოგოლაურმა.

საკრებულოს სხდომაზე ერთ– ერთი საკითხი „სკოლამდელი აღზრდის დაწესებულების“ საქმიანობის ანგარიში იყო.

ქალაქ ახალციხის მუნიციპალიტეტის საკრებულომ რიგით მერვე სხდომა 1 ივლისს გამართა. დეპუტატებმა დღის წესრიგით გათვალისწინებული ოთხი საკითხი განიხილეს და დაამტკიცეს.