ახალციხის მუნიციპალიტეტის მაღალმთიან დასახლებათა ნუსხას, სამი სოფელი (კლდე, ფერსა და ტყემლანა) დაემატა, ბორჯომს – შვიდი (დვირი, სადგერი, ცემი, კორტანეთი, დაბა, მზეთამზე, წაღვერი), ხოლო ადიგენს – 10 (დაბა ადიგენი, ბენარა, გორგული, ვარხანი ფარეხა, წრე, ფლატე, უდე, წახანი, ხევაშენი). ჯამში სამცხე–ჯავახეთის მაღალმთიან ზონას 20 დასახლებული პუნქტი შეემატა.
კლდე ერთ–ერთია ახალციხის მუნიციპალიტეტში, იმ სამ სოფელს შორის, რომელიც მაღალმთიან დასახლებათა ნუსხას შეემატა. კლდესთან ერთად მაღალმთიანობის სტატუსი მიიღო ტყემლანამ და ფერსამ. აღნიშნულ ზონას ბორჯომში შვიდი, ხოლო ადიგენში ათი სოფელი დაემატა. ჯამში სამცხე–ჯავახეთის მასშტაბით, მაღალმთიანის სტატუსი კიდევ 20 დასახლებულ პუნქტს მიენიჭა.
მაღალმთიან დასახლებათა ნუსხის მიხედვით, კვლავ შუაზეა გახლეჩილი სოფელი სხვილისი. ქვედა ტერიტორიამ სტატუსი პირველივე სიის მიხედვით მიიღო. ზემო სხვილისის შემთხვევაში კი მდგომარეობა უცვლელია. მუნიციპალიტეტის მასშტაბით, მაღალმთიანი ზონის შემადგენლობაში არ შედის კიდევ 11 დასახლება.
საქართველოს პრემიერ-მინისტრის განმარტებით, მაღალმთიან ზონას ქვეყნის მასშტაბით, 99 დასახლება დაემატა, რაც 38 ათას ადამიანს მოიცავს. გიორგი კვირიკაშვილის თქმით, ამ დასახლებების თავიდანვე შეყვანა ნუსხაში ვერ მოხერხდა, რადგან არ არსებობდა დასახლებების ერთიანი ნუსხა და სისტემატიზებული მონაცემები.
მაღალმთიან დასახლებათა ნუსხაში განხორციელებული ცვლილების შემდეგ, კანონით განსაზღვრული სოციალური შეღავათები დაუყოვნებლივ ამოქმედდება.
2016 წლის 1 სექტემბრიდან, გაიზრდება სახელმწიფო პენსია და სოციალური პაკეტი. ყოველთვიური დანამატი მიეცემა ექიმსა და ექთანს. ზამთრის პერიოდში მოხდება მაღალმთიან დასახლებაში მუდმივად მცხოვრებ პირთა გათბობის უზრუნველყოფა. ასევე, პედაგოგები მიიღებენ ყოველთვიურ დანამატს.
2017 წლის 1 იანვრიდან გამოყენებული ელექტროენერგიის 50%–ს სახელმწიფო აანაზღაურებს, თუმცა ეს 100 კილოვატის გადაჭარბების შემთხვევაში არ იმოქმედებს.
მაღალმთიან ზონაში მცხოვრები პირები 1 იანვრიდან უკვე სარგებლობენ საგადასახადო შეღავათებით. ასევე, 2016 წელს დაბადებულ ბავშვებზე გაიცემა ფულადი თანხა.
ამ დროისათვის მაღალმთიან ზონაში, საქართველოს მასშტაბით 1 581 დასახლება შედის.
