ახალციხის რაიონულ სასამართლოში ქეთევან ხმალაძისა და მასთან ერთად ბრალდებული ხუთი პირის საქმეზე, წინასასამართლო სხდომა გაიმართა. პროკურორმა ვასილ ოსაძემ საქმის ის მტკიცებულებები წარადგინა, რაც ბრალდების მხარემ დასაშვებად ცნო. გარდა ამისა წაიკითხა იმ 69 მოწმის ვინაობა, რომელთა დაკითხვაც საქმის არსებითი განხილვისას მოხდება.
აღნიშნულის შემდეგ, დაცვის მხარის ადვოკატებმა სადავო მტკიცებულებებზე იმსჯელეს და შუამდგომლობები დააყენეს. მოსამართლე გიორგი ლონდარიძემ მტკიცებულებების სადავოობასთან დაკავშირებით, მხოლოდ ირაკლი ბარძიმაძის შუამდგომლობა დააკმაყოფილა.
სასამართლოზე ასევე განიხილეს ბრალდებულების, მათ შორის ქეთევან ხმალაძის პატიმრობიდან გათავისუფლების საკითხიც. ადვოკატების განმარტებით ის მიზეზები, რის გამოც ბრალდებულები პატიმრობაში რჩებიან არასაკმარისია.
ადვოკატმა ქეთევან ხმალაძის პატიმრობის სანაცვლოდ გირაო 20 ათასი ლარი მოითხოვა. გირაოს თანხა ათიათასით გაზარდა თავად ბრალდებულმა. ხმალაძის თქმით, სასამართლომ უნდა გაითვალისწინოს მისი ჯანმრთელობის მდგომარეობაც, რადგან საპატიმროში იგი დიაბეტით დაავადდა.
მოსამართლე გიორგი ლონდარიძემ ბრალდებულებისთვის აღკვეთის ღონისძიებად პატიმრობა ძალაში დატოვა.
24 ივნისს 14:00 საათზე შემდეგი სასამართლოს სხდომა საქმის არსებითი განხილვით გაგრძელდება.
