ე.წ. ,,ბაკურიანის მიწების საქმეზე“ დაკავებულ ადგილობრივს, ახალციხის რაიონულმა სასამართლომ, აღკვეთის ღონისძიება შეუფარდა. დაცვის მხარემ, ბრალდებულისთვის, აღკვეთის ღონისძიებად 15 000 ლარი გირაოს შეფარდება და ქვეყნიდან გაუსვლელობის პირობა შესთავაზა. მოსამართლე გიორგი ლონდარიძემ, პროკურორის მოთხოვნა დააკმაყოფილა და ალექსანდრე ბოლოთაშვილი წინასწარ პატიმრობაში დატოვა.
პროკურატურა ბრალდებულს 180 მუხლით თაღლითობის გზით, სხვისი ნივთის დაუფლებას და 362 მუხლით ყალბი დოკუმენტების დამზადება–გამოყენებას ედავება.
სასამართლო სხდომაზე პროკურორმა პეტრე მანველიშვილმა განაცხადა, რომ ბრალდებულმა კოხტაგორის მიმდებარე ტერიტორიაზე, 4 000 კვ.მ. მიწის ნაკვეთი თაღლითური გზით დაირეგისტრირა, აქედან 1 000 კვ.მ. გაასხვისა. ფართობი სასოფლო–სამეურნეო დანიშნულების სათიბად იყო დარეგისტრირებული, სინამდვილეში კი აღნიშნული ტერიტორია, ტყის მასივია. ამის გამო, სახელმწიფომ 260 000 ლარამდე იზარალა. პროკურორმა ისიც აღნიშნა, რომ ბოლოთაშვილს კიდევ ჰქონდა სხვა ფართის უკანონოდ დაუფლების მცდელობა.
დაკავებული ბრალს აღიარებს. იგი მზადაა სახელმწიფოს ზარალი აუნაზღაუროს და მიწის ნაკვეთი დაუბრუნოს. მისი ადვოკატის, გიორგი გელხაურის თქმით, ბრალდებულსა და პროკურატურას შორის, საპროცესო შეთანხმებაზე მოლაპარაკებები მიმდინარეობს. დაცვის მხარის თქმით, სწორედ ამის გამო, წინასწარი პატიმრობის საფუძველი არ არსებობდა.
ბრალდებული გუშინ, 25 მაისს, თაღლითობის ბრალდებით, დაბა ბაკურიანში დააკავეს. იგი მეხუთე ადგილობრივია, ვინც აღნიშნული საქმის გამო დააკავეს. ოთხი პირი მიწაზე უარის თქმის სანაცვლოდ, საპროცესო შეთანხმებით გაათავისუფლეს.
დაცვის მხარეს კითხვები უჩნდება იმასთან დაკავშირებით, რომ ბრალდების მხარე, ბოლოთაშვილს იმ დოკუმენტების გამოყენებას ედავება, რომელიც ბაკურიანის რწმუნებულმა გასცა. მიუხედავად ამისა, გოჩა გობრონიძე ამ დრომდე თანამდებობაზე რჩება.
