20 მაისს, გამთენიისას, ახალდაბაში, ბლიაძეების ოჯახი ხმაურმა გამოაღვიძა. ეზოში გასულ ოჯახის უფროსს საკუთარი ავტომანქანა ცეცხლში გახვეული დახვდა. ბორჯომის სატყეო უბნის ტყის მცველის გარდა, გარემოს დაცვისა და ბუნებრივი რესურსების სამინისტროს ცნობით, ბრაკონიერებმა შური ამავე უბნის უფროს – მიხეილ ცხაკაიაზეც იძიეს და მის საცხოვრებელ სახლს ქვები დაუშინეს. პირადი ავტომანქანის გადაწვას ოჯახის წევრები და მეზობლები სამსახურს უკავშირებენ.
ბორჯომის სატყეო სამსახურის თანამშრომლების გარდა, ფიზიკური ზეწოლა ბორჯომ-ხარაგაულის ეროვნული პარკის უბნის უფროს რეინჯერზე განხორციელდა. პარკის ადმინისტრაცია განმარტავს, რომ ფიზიკურ შეურაცხყოფას წინ უკანონო ტყის ფაქტების მოკვლევა უსწრებდა, რა დროსაც რევაზ ქიმაძესთან ნასვამ მდგომარეობაში მყოფი მოქალაქე მივიდა და მას სიტყვიერი და ფიზიკური შეურაცხყოფა მიაყენა.
გარემოსა და ბუნებრივი რესურსების დაცვის სამინიტრო რეინჯერებსა და ტყის მცველებზე ბოლო დროს გახშირებულ თავდასხმებთან დაკავშირებით ოფიციალურ განცხადებას ავრცელებს.
,, სამინისტროს თითოეული თანამშრომელი და განსაკუთრებით, ტყის მცველები, დაცული ტერიტორიების სააგენტოს რეინჯერები და გარემოსდაცვითი ზედამხედველობის დეპარტამენტის თანამშრომლები იცავენ საქართველოს უდიდეს საგანძურს – ტყეს და ტყის რესურსს. სამინისტრო არ შეეგუება სამსახურებრივი უფლება-მოსილების შესრულების პროცესში თანამშრომლებზე ნებისმიერი სახის, მათ შორის ფიზიკური ზეწოლის მცდელობას. ყოველი ასეთი ფაქტი იქნება აღკვეთილი და გამოძიებული შესაბამისი ორგანოების მიერ”, – ნათქვამია განცხადებაში.
მომხდართან დაკავშირებით, შსს-მ ძიება უკვე დაიწყო. გამოძიება სისხლის სამართლის კოდექსის 125-ე მუხლის მეორე ნაწილითა და ამავე კოდექსის 187–ე მუხლით მიმდინარეობს, რაც ცემასა და ნივთის დაზიანებას ან განადგურებას გულისხმობს. შსს-ს ინფორმაციით, დაკავებული ამ დრომდე არავინ არის.
