სოფელ ორჯაში სარწყავი წყლის პრობლემის მოგვარებას ხელისუფლება ჰესის აშენებით გეგმავს

სოფლის ამბები

01.08.2020

მიგრაცია, ასფალტირებული გზების, სარწყავი წყლის, ქუჩის განათებისა და სპორტდარბაზების უქონლობა - ახალქალაქის სოფელ ორჯაში ადგილობრივ ხელისუფლებას უყურადღებობაში ადანაშაულებენ. ორჯაში 165 ოჯახი ცხოვრობს. სოფელში დარჩენილები, ყოველწლიურად 800 ჰექტარამდე მიწას ამუშავებენ, თუმცა უწყლოობის გამო არასდროს იციან როგორ მოსავალს მიიღებენ.

,,ჰაერში დარჩენილი“ ფერმერები, ორჯაში, 500 ჰექტარზე ხორბალს და 300 ჰექტარზე კარტოფილს თესავენ, თუმცა სარწყავი წყლის პრობლემის გამო არასდროს იციან როგორ მოსავალს მიიღებენ. ადგილობრივების თქმით, საბჭოთა კავშირის დანგრევის შემდეგ, სოფელში მორწყვის პრობლემა მალევე შეექმნათ. მიუხედავად იმისა, რომ ადგილობრივ ხელისუფლებას არაერთხელ მიმართეს, სარწყავი წყლის სისტემა კვლავ მოსაგვარებელია.

ზარზანდ არევიანი ერთ ჰექტარსა და 25 მეასედ მიწის ნაკვეთს ამუშავებს. ოჯახის გამოსაკვებად ძირითადად კარტოფილს თესავს. 1995 წლამდე ახლომდებარე სოფლები წყალსაქაჩით ირწყვებოდა, თუმცა მას შემდეგ დაზიანებული სისტემა აღარავის შეუკეთებია. უწყლოობის გარდა, მოსავლის ძირითადი ნაწილი ძლიერმა სეტყვამ გაუნადგურა. ჩაკეტილი საზღვრების გამო კი წელს სეზონურ სამუშაოებზეც ვეღარ წავიდა.

„მიწების მოსარწყავად ახლა ყველაზე კარგი სეზონია, ჩვენ კი წყალი როცა გვჭირდება, ზუსტად მაშინ არ გვაქვს“- ამბობს ზარზანდ არევიანი.

ორჯაში ხელისუფლების იმ დაპირებას იხსენებენ, რომლითაც მერიის მაღალჩინოსნები სარწყავი წყლის პრობლემის მოსაგვარებლად 980 მ სიგრძის მილის მიტანას დაპირდნენ, თუმცა დაპირება ამ დრომდე დაპირებად რჩება.

ახალგაზრდების თქმით, სოფელში ასევე პრობლემაა გარეგანათების, სპორტარბაზის, სტადიონისა და გასართობი კლუბის უქონლობა. ამბობენ, რომ სავარჯიშო ტრენაჟორებიც არ აქვთ. გარნუშ სააკიანის თქმით, ორჯაში არის შენობა, რომელსაც ხელისუფლება სავარჯიშო დარბაზს უწოდებს, თუმცა შიგნით მხოლოდ ერთი საფრენბურთო ბადე ჰკიდია. კიდევ ერთი პრობლემა, რაზეც ორჯაში ამახვილებენ ყურადღებას, საბავშვო ბაღის უქონლობაა.

„გვეუბნებიან, რომ მთავრობა სოფელს ეხმარება, მაგრამ სად მიდის თანხები არ ვიცით“ - წუხს გარნუშ სააკიანი.

სოფელ ორჯის რწმუნებულის თქმით, სოფლის მხარდაჭერის პროგრამის ფარგლებში, მეორე წელია გარეგანათებისთვის ყოველწლიურად 16 000 ლარის ოდენობის თანხა ირიცხება. ამ თანხით რწმუნებულმა შარშან 38, წელს კი მხოლოდ 18 ნათურა იყიდა. რობერტ არევიანი ამბობს, რომ რაოდენობის შემცირების მიზეზი ნათურების გაძვირებაა.

„გარეგანათებას ჯერ არ ვდგამთ, რადგან ამ რაოდენობის ნათურებით მხოლოდ ნახევარი სოფელი განათდება. სრული განათებისთვის 100-მდე ნათურა მაინც არის საჭირო, ამიტომ ნათურებს ვიმარაგებ, რომ სოფელში განათება ერთიანად ჩავრთო“ - გვითხრა სოფელ ორჯას რწმუნებულმა რობერტ არევიანმა.

ჯავახეთის სხვა სოფლების მოსახლეობის მსგავსად, ორჯის მაცხოვრებელთა მინიმუმ ნახევარიც მიგრანტია. ადგილობრივები სახელმწიფო ენის უცოდინრობისა და ქვეყანაში არსებული უმუშევრობის გამო, ნათესავებისა და ახლობლების დახმარებით სეზონურ სამუშაოებზე - ე.წ. ,,ხოფანზე“ რუსეთში დადიან.

„ახლა როცა ყველა სოფელშია და მათი ძირითადი შემოსავალიც მხოლოდ სამეურნეო საქმიანობაზეა დამოკიდებული, კორონავირუსის პანდემიის გამო მოსახლეობას, ალბათ ძალიან გაუჭირდება“ - აცხადებს სოფელ ორჯას რწმუნებული რობერტ არევიანი.

ორჯაში არსებული პრობლემების შესახებ იცის ახალქალაქის მერმა. იური უნანიანის თქმით, სარწყავი წყლის პრობლემის მოგვარება კორონავირუსის პანდემიის გამო გაჭიანურდა. ახალქალაქის მუნიციპალიტეტმა პრობლემის შესახებ წყლის მეურნეობის სააგენტოს უკვე მიმართა. ახალქალაქის პირველი პირის ინფორმაციით, ქვეყნის ხელისუფლება პრობლემის მოგვარებას ჰესის აშენებით გეგმავს. პროცესი დაწყებულია და გამარჯვებულმა კომპანიამ სოფელთან ხელშეკრულებაც გააფორმა. კონტრაქტის მიხედვით, სარეაბილიტაციო სამუშაოები სექტემბრიდან უნდა დაიწყოს.

ხელისუფლების დაპირების არ სჯერა სოფლის მოსახლეობას. რობერტ არევიანი ამბობს, რომ ორჯის რწმუნებულის პოზიციაზე 2013 წლიდან მუშაობს. თანასოფლელების მსგავსად ისიც ფიქრობს, რომ სექტემბრიდან სამუშაოების დაწყება ორი მიზეზის გამოა საეჭვო. ერთი, რომ სამუშაოების დაწყება სხვადასხვა მიზეზის გამო ბევრჯერ გადაიდო დაა მეორე, გასათვალისწინებელია ქვეყანაში შემოდგომით არსებული ეპიდემიოლოგიური ვითარება.

„კორონავირუსის პანდემიის გამო, მთავრობამ ვერ შეძლო ორჯაში წყლის შემოყვანა, რის გამოც პრობლემის მოსაგვარებლად სოფლის მოსახლეობამ საკუთარი სახსრებით ფული შეაგროვა“ - ამბობს სოფელ ორჯის რწმუნებული რობერტ არევიანი.

სოფელი ორჯა ახალქალაქიდან 9 კილომეტრით არის დაშორებული. სოფელი ზღვის დონიდან 1680 მეტრზე მდებარეობს.

გამოცემულია საქართველოს ღია საზოგადოების ფონდისა და საქართველოს სტრატეგიის და განვითარების ცენტრის (GCSD) ფინანსური მხარდაჭერით. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდისა და ცენტრის პოზიციას. შესაბამისად, ღია საზოგადოების ფონდი და საქართველოს სტრატეგიის და განვითარების ცენტრი არ არიან პასუხისმგებელი მასალის შინაარსზე.