ახალციხის ციხის ტერიტორიაზე, ხალიჩების მეორე საერთაშორისო ფესტივალი გაიხსნა. რამდენიმე პავილიონში ქართველი და უცხოელი ხალხური რეწვის ოსტატების ხალიჩები, ფარდაგები, საკოლექციო ნიმუშები, სუვენირები და სამკაულებია გამოფენილი.

ორი დღის განმავლობაში გაიმართება ლექციები, ხალიჩისა და ფარდაგის ქსოვის გაკვეთილები, მსურველებს შალის ჩეჩვას, ძაფის დართვისა და ღებვის ტექნიკას, ქსოვისა და ქარგვის მეთოდებს უჩვენებენ.

ფესტივალში რვა ქვეყნიდან 30–მდე ხალხური რეწვის ოსტატი მონაწილეობს, რომლებიც ტრადიციულ ხელოვნებას და ქსოვის ტექნიკას წარმოადგენენ.

ხალიჩების მეორე საერთაშორისო ფესტივალი თბილისში, 28 ივნისს გამოფენით გაიხსნა. 30 ივლისიდან კი ახალციხეში გადმოინაცვლა, სადაც 3 ივლისამდე დარჩება. გამოფენის დათვალიერება 10–დან 18:00 საათამდეა შესაძლებელი.

ფესტივალი პროექტ Check In Georgia - ს ფარგლებში იმართება და მიზნად ქართული ხალიჩების პოპულარიზაციას, მისი მხატვრული, ესთეტიკური, კულტურული და სოციალური როლის წარმოჩენას ისახავს.