სოფელ რუსთავში ბრუცელოზით დაავადებულ ადამიანთა და ცხოველთა რიცხვი იზრდება. ადგილობრივების თქმით, დაახლოებით, ათი წელია, რაც დაავადებამ საქონელში თავი იჩინა. ბოლო სამი წლის განმავლობაში კი ინფიცირების შემთხვევებმა მნიშვნელოვნად იმატა. გარდა ამისა, დაფიქსირდა ბრუცელოზის პირუტყვიდან ადამიანზე გადაცემის შემთხვევები. მოსახლეობა სახელმწიფოსგან დახმარებას ითხოვს.
35 წლის ემზარ პაქსაძეს, ბრუცელოზის ქრონიკული ფორმა აქვს. ახალგაზრდა მამაკაცს, დედაქალაქში მკურნალობის ხანგრძლივი პროცესი ელის. საშიშ ინფექციურ დაავადებასთან ბრძოლა, მას მთელი ცხოვრება მოუწევს. პაქსაძე, სოფელ რუსთავში ერთადერთი არ არის, ვინც შინაური პირუტყვისგან, ბრუცელოზით დაინფიცირდა. აქ დაავადების მატარებელი ათამდე მოსახლე და თითქმის ყველა ფერმერის საქონელია.
ზურაბ პაქსაძეს, ბრუცელოზით დაავადებული ოთხი მეწველი ძროხის გაყიდვა, ნახევარ ფასად მოუწევს. მისი თქმით, 1 400 ლარად შეფასებულ ერთ სულ საქონელში, სასაკლაო მხოლოდ 600–700 ლარს გადაუხდის. ფერმერი შიშობს, რომ დაავადებით დანარჩენებიც დაინფიცირდებიან და კრედიტით შეძენილი მსხვილფეხა რქოსანი პირუტყვის გაყიდვა მოუწევს. პაქსაძეების ოჯახში, ბრუცელოზის მატარებელი მხოლოდ პირუტყვი არ არის. დაავადებით ოჯახის ერთი წევრიც დაინფიცირდა.
სოფელი რუსთავი, სამცხე–ჯავახეთში, ბრუცელოზის ერთადერთი კერა არ არის. დაავადება ადიგენისა და ახალციხის მუნიციპალიტეტებშიცაა გავრცელებული – ამბობენ ვეტერინარები. თუმცა, ახალციხის სავაჭრო ცენტრში, რძის ნაწარმის გამყიდველები ირწმუნებიან, რომ ახლომდებარე სოფლებში ბრუცელოზის შემთხვევები არ დაფიქსირებულა და ამიტომ ყველსაც ახალციხელებისგან იბარებენ.
ლაბორატორიის გამგე, ,,მე–9 არხის“ გადამღებ ჯგუფთან განმარტავს, რომ ფერმერებს, წელიწადში ორჯერ, მათთან ძროხის ჯანმრთელობის მდგომარეობის შესახებ ცნობა მიაქვთ, თუმცა იმის დადგენა, ნამდვილად ჯანმრთელი საქონლის რძისგანაა თუ არა დამზადებული ყველი, შეუძლებელია.
რუსთაველები დახმარებას ხელისუფლებას სთხოვენ. ფერმერების თქმით, ბრუცელოზის კერის მოსპობა, მხოლოდ ვაქცინაციითაა შესაძლებელი. სურსათის ეროვნულ სააგენტოში კი ამბობენ, რომ დაავადებასთან საბრძოლველად, სახელმწიფოს 3–წლიანი გეგმა აქვს, რომელიც სამცხე–ჯავახეთიდან და კახეთიდან დაიწყება და მთელ საქართველოს მოიცავს.
ბრუცელოზი საშიში ინფექციური დაავადებაა, რომელიც ქრონიკულად მიმდინარეობს და ადამიანს მთელი ცხოვრება აავადებს. იგი მამაკაცებში უშვილობის მიზეზი ხდება. ადამიანი ბრუცელოზით ცხოველთან კონტაქტის, აუდუღებელი რძის ან მოუხარშავი ხორცის მიღების შემთხვევაში შეიძლება დაინფიცირდეს. დაავადება ადამიანიდან ადამიანს არ გადაეცემა. დაავადებული პირუტყვი მკურნალობას არ ექვემდებარება, ის შესაბამისი წესების დაცვით, სასაკლაოზე უნდა დაიკლას.
